2018-imut aningaasanut inatsit: Aaqqissuusseqqinnerit suli akuersissutigineqanngitsut millionilikkaanik tapertaasut

Politikerit aaqqissuusseqqinnissanit suli naammassineqanngitsunit isertitassatut naatsorsuutigisatik aningaasanut inatsimmut missingersuusiornerminni ilanngukkamikkit imminnut ilungersortittussanngorput.

Akileraartarnermi ineqarnermilu aaqqissuusseqqinnernit, aatsaat aappaagu saqqummiunneqartussanit, 100 millionit koruunit sinnerlugit isertitaqarnissamut naatsorsukkat ilanngullugit 2018-imut aningaasanut inatsimmi missingersuutaapput.

Tassalu nunarput oqimaaqatigiissitsiffiusumik aningaasaqarniassappat, politikerit aaqqissuusseqqinnernik taakkuninnga naammassinninnissamut pinngitsaalisaapput.

- Piffinni nutaajunerusuni aaqqissuusseqqinnernut allanut naleqqiullugit aaqqissuusseqqinnerujussuussapput. Taamaammat una immikkuualuttuinnaanngilaq. Una pingaaruteqartorujussuuvoq, aningaasaqarnermut professori aningaasaqarnermullu siunnersuisoqatigiit siulittaasuat, Torben M. Andersen oqarpoq.

Politikkikkut suliassaq pingaarutilik

Naalakkersuisut akileraartarnermut ineqarnermullu aaqqissuusseqqinnernit 250 millionit koruunit missaannik isertitaqarnissamik missingersuusiorput. Aaqqissuusseqqinnissalli taakku ilaannaat ataatsimiinnermi matumani akuersissutigineqarnissaat pilersaarutaavoq.

Aaqqissuusseqqinnissallu suli akuersissutigineqanngikkaluartut, missingersuusiorfimmi 2018-imit 2021-mut 27,8 millionit koruuninit amerlanerunngitsunik amigartooruteqarnissamut tapertaapput. 

AAMMA ATUARUK Sinneqartooruteqarnermit amigartooruteqarninngortoq

Aaqqissuusseqqinnissaniillu Inatsisartunit suli akuersissutigineqanngitsunit isertitassatut naatsorsukkat ilanngunnerat ajornartorsiutaalersinnaavoq.

- Tassalu aningaasanut inatsisissaq oqimaaqatigiissitsiffiussappat, politikkikkut pingaarutilimmik suliassaqarpoq, Torben M. Andersen oqarpoq.

Akileraartarnermi aaqqissuusseqqinnerni ilaatigut ernianut ilanngaat ernianut tapiissutinngortinneqassasoq aningaasanut inatsimmi allaqqavoq. Ineqarnermilu aaqqissuusseqqinnermi pisortat inissianut tunngasunut aningaasartuutaasa millisarnissaat anguniarneqarpoq.

Politikerit imminnut ilungersortittut

Taamaaliornerlu ajornartorsiutit aaqqiinissaannik siunissamut kinguartitsinerusoq, aningaasarpassuillu pineqarmata politikerit imminnut ilungersortittussanngortut, Torben M. Andersen nassuiaavoq.

- Suliarmi naammassisinnaanngikkunikku taava siunissami assingusumik iliuuseqarunik tatigineqarnerat tutsuigineqarnerallu minnerussaaq, Torben M. Andersen oqarpoq.

AAMMA ATUARUK Aalisakkat annerusunik akileraaruserniarneqarneri ataatsimiititaliap isumakuluutigigaa

Naalakkersuisut akileraartarnermut tunngasuni siunnersuutaat akuersissutigineqassappat, 250 millionit koruuniniit 110 millionit missaat nassaarineqassapput.

140 millionit koruunit kingulliit aaqqissuusseqqinnernit aappaagu saqqummiunneqartussanit nassaarineqassapput.