Assi: KNR

Qulaarpaa Aaqqissuusseqqinnerit nuanninngitsut ajornarneruleraluttuinnassapput

Aaqqissuusseqqinnissaq kinguarsaannarutsigu ajornarnerulissaaq. Taama politikerinut ukiuni kingullerni aalajangernissamik kinguartitsisaqattaarsimasunut oqariartortoqarpoq.

Naalakkersuisut aningaasanut inatsisissatut siunnersuutaat aaqqissuusseqinnissamik suliassanik siunertaannaanngitsunik aallartitsisariaqarpoq.

- Oqaatigineqareersutut politikerit annertuumik suliassaqartut aningaasanut inatsisissap uppernarsarpaa, annerpaartaali tassalu qanorpiaq iliorniarneq, maannamut suli paasinngilarput, tamannalu qulaarneqarnissaa pingaaruteqarpoq, Kalaallit Nunaanni aningaasaqarnermut siunnersuisoqatigiit siulittaasuat, professori Torben M. Andersen oqarpoq.

 

Kinguarsaannaraanni suliassaq annertunerulissaaq

Akileraartarnermut atugarissaarnermullu ataatsimiititaliap 2011-imi siunissaq unamillernartussanik ulikkaartoq ersarissisimmaguli aaqqissuusseqqinnissat eqqartorneqartalerput. Torben M. Andersenillu erseqqissaatigaa kinguarsaannaraanni suliassaq annertunerulissasoq. Grønlandsbankenillu pisortaata isumaqatigaa.

- Ajornarneruleraluttuinnassaaq. Takornartaanngilarli sivisuumik suliassaasarneri, nunani allani aamma taamaappoq, aningaaseriviup pisortaa Martin Kviesgaard oqarpoq.

 

Sivisuumik aallartinniarneq

Aaqqissuusseqqinnerni politikerit sivisuumik aallartinniartarnerat pissusissamisoornerarpaa.

- Ajornarnerata suliassallu sakkortusinnaanerata tamanna ersersiinnarpaa, ilimagaarali politikerit aaqqissuusseqqinnissap qanoq pisariaqartiginera paasisimagaat, aaqqissuusseqqinnernillu taaneqarsinnaasunik iliuuseqatoqassasoq, Martin Kviesgaard oqarpoq.

Aallartittoqartariaqarporli aaqqissuusseqqinnerimmi piffissartornarmata.

 

Sunniuteqarnissaanut sivisussaaq

Aningaasarsiornermut ilisimatuup Torben M. Andersenip politikkikkut aalajangerniarnermiinnaanngitsoq, aalajangernermiilli piviusunngortitsinermut aamma piffissaq sivisooq atorneqassasoq erseqqissaassutigaa. Tassa suliassatigut allaffissornikkullu. Tamassumalu kingorna aamma sunniutivinnissaanut piffissaqaqqaassalluni.

- Taamaattumik iluamik sunniuteqarnissaata tungaanut piffissaq annertussaaq, suliallu maanna aallartittariaqartut tamassuma ersersippaa, Torben M. Andersen oqarpoq.

 

Qulequttat kusanartut qulequtaannaalli

Aningaasanut inatsimmi aaqqissuusseqqinnissamut qulequtarineqartut nassuiarluarneqarsimasut Martin Kviesgaard isumaqarpoq.

- Qulequtaannaappulli. Aaqqissuusseqqinnerit imarisai suli takunngilagut, ukiullu ingerlanerani suliassat suussanersut paasinissaat soorunami pingaaruteqarpoq, Kviesgaard oqarpoq.

 

Suliassaq annertooq akisussaaffik annertooq

Ajornartorsiutit aamma ersareqaat. Siunertallu aamma ersaripput, politikerilli iliuuseqarnissaat utaqqineqarpoq.

- Taamaammat oqartoqarsinnaavoq politikkikkut aalajangertoqarnissaa piffissanngortoq, aningaasaqarnerup ineriartorneranut pingaaruteqarpoq politikerillu suliassaat annertooq pingaaruteqartorlu utaqqivoq, siunissamilu ataavarsinnaasumik aaqqiinissaminnut akisussaaffeqarput, Torben M. Andersen naggasiivoq.

Isummersuutit


 

Pages