Aaqqissuusseqqinneq: Vittus Qujaukitsoq borgmesterinik Ilulissani ataatsimeeqateqassaaq
Borgmesterit sisamaasut peqataanerisa saniatigut Danmarkimi aningaasaqarnermut nunamullu namminermut ministeri, Margrethe Vestager peqataassaaq, taassuma Danmarkimi kommunit kattussuunneranni misilittakkaat oqaluttuarissallugit.
- Nalilersuineq sunik tunngaveqassanersoq qanorlu kommunerujussuit nalilersorneqassanersut eqqartugassatta pingaarnersarissavaat, Vittus Qujaukitsoq oqarpoq.
AAMMA ATUARUK Aaqqissuusseqqinneq: Asiip utaqqiisaagallartumik aaqqiineq naammagisimaarpaa
Kommunit pillugit aaqqissuusseqqinnermi oqartussat suliaannik oqilisaanissaq aamma kommunit ataasiakkaat nukittunerulernissaat anguniarneqarpoq taamatullu kommunini innuttaasut ataasiakkaat aalajangiinernut ammaaffigineqarnerunissaat anguniarneqarluni. Aamma innuttaasut sullinneqarnerisa pitsaanerulersinneqarnissaat anguniakkat ilagaat taamaalilluni qanimut oqartussaaqataaneq anguniarneqarluni.
Tamakku tamarmik ullumikkut anguneqarsimanersut tassa Vittus Qujaukitsup paasiniaavigisussaassavai.
Ukiuni marlunni nalilersuineq
Kommunit ataasiakkaat angissutsimikkut ullumikkut qanoq inissisimanersut paasiniakkanut ilaasussaavoq. Tamannali aatsaat aappaagu oqallisigineqarluni aallartissinnaassasoq, Vittus Qujaukitsup tusagassiuutinut nalunaarummini oqaatigaa.
Nalilersuinerup tamakkerluugu suliarineqarnera ukiuni marlunni sivisussuseqassasoq, Aningaasaqarnermut Nunamullu Namminermut Naalakkersuisup, Vittus Qujaukitsup oqaatigaattaaq.