Aaqqissuusseqqinneq: Asiip utaqqiisaagallartumik aaqqiineq naammagisimaarpaa
Qeqqata Kommunia Kommuneqarfik Sermersoorlu isumaqarput maanna siunnersuutigineqartumi qularnartortallit amerlavallaartut.
AAMMA ATUARUK ATAATSIMUT ISIGALUGU Kommunini nalimmassaaneq
Aningaasaqarnermut Naalakkersuisup, Vittus Qujaukitsup, siunnersuummi pineqartumi qularnaateqarsinnaasut arlallit tunngavigineqarmata nassuerutigaa. Taamaattumik 2016-imi naligiissaarinissap tungaanut pitsaanerusunik kisitsisitigut tunngavissaqalernissamut sulineq aallartinneqareersoq oqaatigalugu.
- Vittus Qujaukitsup naligiissaarinermut aaqqissuussinermut atatillugu kisitsisit tunngavigineqartussat maanna pigineqannginnerat nassuerutigimmagu taamalu 2015-imut aaqqiigallartoqarnissaanik siunnersuuterput malinnialermagu nuannaarutigaarput, Kommuneqarfik Sermersuumi borgmesteri Asii Chemnitz Narup oqarpoq.
Eqqarsaatigilluagaanngitsumik aaqqiiniarneq mianersoqqussutigaa
Tamatumunnga atatillugu aaqqissuussinermi ukiumi ataasiinnarmi atuuttussami angisuunik allanngortiterinikkut inuiaqatigiit aningaasaqarniarnerat angisuumik ajornartorsiortinneqalersinnaammat, taassuma mianersoqqussutigaa. Soorlu 56 millionit koruuninik nuussinikkut, soorlumi kingullertut siunnersuutigineqartutut, Kommuneqarfik Sermersuumi soraarsitsiortortoqassaaq kommunillu aningaasanik tigusisussat atorfinitsitsissallutik.
- Eqqarsaatigilluagaanngitsunik innuttaasut inuunerannik imaaliallaannaq allannguinernik kinguneqarsinnaasunik aaqqiissutissanik iliuuseqannginnissarput qulakkeertussaavarput, taamaattumik Kommuneqarfik Sermersuumit siunnersuutigaarput 2014-imi aaqqiissut nangittumik atuinnassagipput, Kommuneqarfik Sermersuup borgmesteria oqarpoq.
Naligiissaarinissamut aaqqissuusseqqinneq Ilulissani aqagu ataatsimiinnermi oqaluuserineqassaaq.
