Aaqqissuusseqiinnissaq Kanukokami oqaluuserineqassaaq
Kanukokap Ilulissani ataatsimeersuarnissaani oqaluuserisassat pingaaruteqartut arlaqarput. Nunatsinni innarluutillit atugaannik oqaluuserinninnissap saniatigut kommuneqarfiit siunissami aaqqissuunneqaqqinnissaannut tunngasut aamma oqaluuserineqassaapput. Aaqqissuussaanermut Ataatsimiititaliap siornaak 2003-imi sulilluni aallartittup aaqqissuusseqqinnissaq pillugu suliaa saqqummiunneqassaaq. Saqqummiutassat pingaaruteqarluinnartussaasut Kanukokap siulittaasua Jens Lars Fleischer oqarpoq:
-Ataatsimiititaliaq saqqummiisussaavoq, tassanilu sumut killittoqarsimanersoq eqqartorneqassaaq. Taamaalilluni kommunalbestyrelsinut ilaasortat nutaat aallartitaallu nutaat aamma ilisimatinneqarniassammata.
Aaqqissuussaanermut Ataatsimiititaliap saqqummiussinissaa pingaaruteqarpoq, Jens Lars Fleischer:
- Massakkut ingerlariaqqittariaqarnitsinni killiffiortariaqarpugut, qanorlu siunnerfeqarnerluta oqillisigisariaqarparput. Isumaqarpunga suliaq ingerlasariaqartoq aammalu ukiuni tulliuni naammassisariaqartoq.
- Kinguarteqattaaginnaraluarutsigu naammassisaqarnissarput qularnarpoq, taamaammat massakkut qinikkat neriuppunga piumassuseqarluarlutik sulinissamut peqataajumaartut, imaanngitsoq Danmarkimi kommuninik massakkut nutarterisoqarmat, kisiannili uagut naammassisariaqaratta. Jens Lars Fleischer oqarpoq Kanukokami qullersanngortussat qanoq aalajangernerat najoqqutaralugu ingerlaqqittoqassasoq.
Kanukokap ataatsimeersuarnissaani siulersuisussanik siulittaasussamillu qinersisoqalerpat Jens Lars Fleischer, Uummannami massakkut borgmesteriusoq siulittaasussamut sassaqqinniarluni oqarpoq.
