Aaqqissuussaaqqinneq pillugu ataatsimiinneq naammassivoq

Borgmesterit kommunaldirektørillu ataatsimiinnerat Nuummi ingerlanneqartoq naammassivoq. Ajoraluartumilli ataatsimiinnermit angusat naalakkersuisunullu ingerlateqqinneqartussat pingaarnerit saqqummiussinnaanngilagut, borgmesterit kommunit aaqqissuussaanerat piffissalersuinerlu pillugu oqallisereermata inerneri saqqummiunneqartussanngormata tusagassiortut ataatsimiinnermit anisitaammata.

KANUKOKA-mi siulittaasup Lars Karl Jensen-ip ataatsimiinerup ingerlanera ima nalilerpaa:

-Ukiamit saqqummiunneraninngaanniit suliassat kommunit angerlaallugit suliarisimasaat, malunnartorujussuuvoq aallaavilersorneri aammalu qanoq ingerlariaqqinnissaat sammineqartoq, Lars Karl Jensen oqarpoq.

Borgmesterit kissaataat piffissamik sivitsuinissaq kiisalu qinersinerup allanngortinneqarnissaanik piumasaqarnerit kingunerivaat suleqatigiissitamik pilersitsisoqalernera.

-Ukiarmili borgmesterit siullermeerlutik isumaliutissiissut tigugamikku piffissaqarnerunissartik kissaatiginikuuaat. Maannakkut suleqatigiissitamik pilersitsissaagut, taanna siulersuisuni aamma inussiarnersumik tigoreerparput, taakkuuppullu tassannga nalilersuisussat, taamaattumillu naalakkersuisunut inatsisartunullu oqariartuutissagut maannakkut uani saqqummiunneqartuni imaqartussaapput, Lars Karl Jensen oqarpoq.

Lars Karl Jensen-ip siulittaasutut ataatsimiinneq toqqissiallaatigaa:

-Toqqissiallaatigisorujussuuara suliassaq tamakkiisumik tiguneqarmat. Kommunit kattussuunnissaanut suliassaq, taavalu kikkunnik suleqateqarsinnaanermik suli oqaloqatiginninneq ingerlasoq maluginiarpara. Minnerunngitsumik aamma maluginiarpara suliassani ataasiakkaani ersarissaasoqarnissaanik arlalippassuarnik oqariartuuteqarnerat. Taakkua naalakkersuisunut aamma paaseqatiginniutigisussaassavagut, Lars Karl Jensen naggasiivoq.