Kalaallit Nunaata Danmarkillu nunanut allanut politikkimut Issittumilu sillimaniarnermut politikkimut tunngasuni atassuteqaqatiilluarnerulertariaqartut, Danmarkip nunani tamalaani pissutsinik mississuisoqarfianit allaatigisami kaammattuutigineqarpoq.Assi: Københavns Universitet

Aaqqissuussaanitoqaq Danmarkip Kalaallit Nunaatalu atassuteqaqatigiinneranni akimmititsisoq

Kalaallit Nunaata Danmarkillu Kalaallit Nunaat pillugu atassuteqaqatigeeriaasiata pitsanngorsarnissaanut tunngavissaqartoq, ilisimatuut allaatigisaanni erserpoq.

Kalaallit Nunaata Danmarkillu nunanut allanut tunngasuni atassuteqaqatigeriaasitoqaat ineriartornermit katataavoq, tamatumalu pitsanngorsarnissaanut tunngavissaqarpoq.

Tamanna Danmarkip nunani tamalaani pissutsinik mississuisoqarfianit allaatigisami tusarliunneqarpoq.

- Kikkut sumut qanoq ilisukkut aperinissaannut najoqqutassiortoqarmat, Kalaallit Nunaata nunanut allanut sillimaniarnermullu Københavnimi politikkilianut tunngasunik paasissutissarsisarnissaa siunertaavoq, Danmarkip nunani tamalaani pissutsinik mississuisoqarfiani ilisimatusartuuneq Ulrik Pram Gad oqarpoq.

- Tassa imaappoq, nunanut allanut ministerip taassumalu atorfilittai naalakkersuisut siulittaasuannut aamma nunanut allanut naalakkersuisumut soorunamilu taakkua atorfilittaannut ilaanni sianertarnissaat siunertarerpiarlugu atassuteqaqatigeriaasissaannut najoqqutassiortoqarpoq, taanna ilanngullugu oqarpoq.

Maannakkut pissutsinut naleqqutinngitsoq

Atassuteqaqatigeriiaasialli nutaanngilivoq.

Kalaallit Nunaannimi Namminersornerullutik Oqartussaqarunnaarluni Namminersorlutik Oqartussaqalernerata ilutigisaanik Kalaallit Nunaat nunanut allanut politikkip Kalaallit Nunaannut tunngasortaata ilaanut nammineq akisussaaffeqalermat atassuteqaqatigeriaasiat ineriartornermit qangali katataasimasoq, Ulrik Pram Gad oqarpoq. 

Ilisimatusartuunerup Ulrik Pram Gadip Ph.d-nngorniallu Sara Olsvigip Kalaallit Nunaata Danmarkillu atassuteqaqatigiilluarnerulernissaannut kaammattuutaat:

 

Naalakkersuisut Inatsisartut Nunanut Allanut Sillimaniarnermullu Ataatsimiititaliaanik pinngitsooratik aalajangeeqateqarnerusaleqqullugit, inatsit allanngortittariaqarpoq.

 

Danskit naalakkersuisuisa Kalaallit Nunaanni politikerit Kalaallit Nunaat Issittorlu pillugit politikkikkut ataatsimiinnerni peqataatitsisalissapput.

 

Allagaatit qitiulluinnartut aamma kalaallisoortaqartassapput.

 

Folketingip nunanut allanut tunngasunut aalajangiisartoqatigiivi Inatsisartut Nunanut Allanut Sillimaniarnermullu Ataatsimiititaliaallu ileqquusumik ataatsimeeqatigiittalertariaqarput.

 

Tusarfik: Danmarkip nunani tamalaani pissutsinik mississuisoqarfia (Dansk Institut for Internationale Studier)

Aaqqiissuussineq ministerinuinnaq atuuttoq, nunat marluk taakkua nunanut allanut politikkimut Issittumilu sillimaniarnermut politikkimut tunngasunik assigiinngitsunik paasissutisseeqatigiillutik atassuteqaqatigiissitsisinnaavoq. Tamanna ingammik nunanut allanut politikkip sillimaniarnermullu politikkip immikkoortikkuminaassinnaaneranni ajornartorsiutaavoq.

- Aaqqissuussinermi pitsanngorsagassanik marlunnik nassaarpugut, Ulrik Pram Gad oqarpoq. Taanna Ilisimatusarfimmi Ph.d-nngorniaq Sara Olsvig peqatigalugu allaatiginnittuuvoq.

AAMMA ATUARUK Inatsisartut ataatsimiititaliaat: Danskit nunanut allanut tunngasunut ministeriata tikeraarnissaanik ilisimatinneqanngilagut

Naalakkersuisut, danskit naalakkersuisui Folketingip nunanut allanut tunngasunut aalajangiisartoqatigiivinik pingaarutilinnik aalajangiinnginnerni pinngitsooratik isumasioqateqaqqaartartussatulli, Inatsisartut Nunanut Allanut Sillimaniarnermullu Ataatsimiititaliaannik isumasioqateqaqqaartariaqartanngitsut, taanna erseqqissaavoq.

Atassuteqaqatigiilluanngitsut

- Tamanna siullertut pitsanngorsagassaavoq. Namminersorlutik Oqartussat akisussaaffigilersimasarpassui politikkikkullu aqutseriaasiat aappaattut pitsanngorsagassaapput. Akisussaaffeqarfigilersimasaata ilaat nunanut allanut aamma tunngapput - tamanna soorunami ajunngilaq. Aamma namminersorneq pillugu inatsit naapertorlugu inerteqqutaanngimmat, taanna oqarpoq nangillunilu:

- Ilaali sillimaniarnermut aamma tunngapput - taamaammat Kalaallit Nunaat Københavnilu aalajangeeqatigiinngitsoortarunik paasissutisseeqatigiinngitsoortarunilluunniit atassuteqaqatigiilluanngereernerat ingalluni ajalusoorataannaasoq, Ulrik Pram Gad oqarpoq.

AAMMA ATUARUK Naalakkersuisut kukkuluttoreerlutik danskit ministeriat tikeraaqqinnissaa sulissutigaat

Tamanna Folketingimi politikerit Københavnimi nunanut allanut ministereqarfiup aalajangiinerani peqataatinneqartarnermisulli, Nuummi nunanut allanut sillimaniarnermullu politikkinut tunngasuni aalajangeeqataatitaasinnaannginnertik tupaallaatigissagaat, ilisimatusartuuneq oqarpoq. 

- Taaamaammat najoqqutassiatoqqat nutartertariaqakkanik ilaqarput. Tamanna nunat marluk taakkua atassuteqaqatigiilluannginnerannik kinguneqarpoq. Ingammik inatsisartut akornanni, Ulrik Pram Gad oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl