Aaqqissuisuunerup qallunaap puisit illersorpai

- Sooq uumasunik illersuiniaqatigiit mink-nik illersuiinnaratik kukkukuunik puulukinillu illersuinngillat?” Taama aperivoq Susanne Sayers allaaserisamini ullumi saqqummersumi qallunaat aviisianni 24timerimi.

- Taamak aperineranut tunuliaqutaasoq tassaavoq facebookertilluni allat puisit amii pillugit isummersortut atuarsimagamigit. Allanneqarsimapput soorlu puisit amiinik atisaqartartut merianngunartuunerarlugit ingasaginerarlugillu.

- Sooruna amernik, puisip amianiunngitsoq, kamippaqarnissaq ajorineqarneq ajortoq? Sooruna puisit amiinut akerliliisoqarniartaqisoq, taamaattorli neqaarniat uparuarneqassanatik puulukinik suliaqaraangata? Susanne Sayers aperivoq. Susanne isumaqarportaaq taassuma nassuiaatissartaa tassaasoq uumasunik amilinnik inequginnittarneq.

Susanne Sayersip taakkartorpaa puisit namminneq kiffaanngissuseqarlutik uumasuusut, ukiorlu tamaat nerineqarluartartuusut. Taamaammat isumaqarpoq uumasut allat, puisituulli kiffaanngissuseqaratik uumasimasut nallinnarnerusut.

Uumasut naalliutsinneqarlutik uumasuusut isiginiarnerusarsigit, asuli toqqaannaq puisit amiinik atisalinnut ajortussarsiuinnarasi, taama Susanne Sayers oqariartuuteqarpoq puisit amiinut akerliliisunut.

- Uumasunik naalliutsitsisarneq unitsittariaqarparput, tamannalu aamma soorunami atuuppoq uumasut kukkukuujugaluarpata minkiugaluarpataluunniit. Kisianni soorunami amernik nuannarinnittoqarsinnaavoq, saniatigullu uumasunik naalliutsitsinermik akerlerinnilluni, Susanne Sayers-ip allatani taama naggarserpaa.