Aaqqissuisoq: Tusatsiakkanik tunngaveqarluta tusagassiunngilagut

Siumumi ulluni makkunani pisimasut pillugit tusagassiorfiit samminninnerat pissusissamisoortuuvoq, tusagassiorfittullu pisussaaffinnik maleruaanerulluni. Radioaviisimi aaqqissuisoq Mariia Simonsen erseqqissaavoq, naalakkersuisut siulittaasuata Hans Enoksenip tusagassiortunik pisunut tunngatillugu piumasaarsorneraaneranut qisuariaateqarluni.

- Pisussaaffigaarput pisut malinnaaffigissallugit oqaluttuarissallugillu. Soorunalumi partiit nunatsinni annersaasa ilaanni pisut taama ittut, aalassatsitsisut aamma ilanngullugit oqaluttuarissavagut. Aammali piumasarsorluta nammineq nassaarsiorluta pinngilagut, partiilli iluaneersunik tusarfeqarluta, nammineq oqaluttuartunik saqqummersut oqaluttuartillugit.

Aaqissuisup erseqqissaatigaa pisimasoq eqqartorneqartoq ileqqorissaarnermut tunngammat.

-Naapertuuppa naalakkersuisoq tunuaqqammersoq Aningaasaqarnermut Ataatsimiititaliami siulittaasunngortissallugu? Ileqqorissaarnermut naleqquppa? Imaluunniit naleqqutinngila? Apeqqutit tamakku qitiupput assortuussutaallutillu.

Mariia Simonsenip aamma erseqqissaatigaa Siumup iluani pisut partiimi ilaasortaannanngitsunut qinersisartunulli tamanut soqutiginaateqarmata tusagassiuutini sammineqartut.

Naalakkersuisut siulittaasuata oqaaseqarneranut inatsisartuni ilaasortaq Ruth Heilmann oqaaseqartinniaraluaratsigu taamaaliorsinnaannginnerarpoq, siulittaasuminnit tallimanngormalli avammut oqaaseqaqqusaajunnaarsimanini pissutigalugu.