Aaqqiissutissamik nassaartoqarnissaa isumalluarfigaa

Puisit amiinik illoqarfinni tunisinerup unitsinneqarneranut atatillugu aaqqiissutissamik ulloq manna tikillugu suli nassaartoqanngilaq. Taamaattoq naalakkersuisoq Ane Hansen akuliukkusunngilaq, illuatungeriit akornanni isumaqatigiittoqarnissaa naatsorsuutigigamiuk.
Allattoq Apollo Jeremiassen
marsip 17-at 2010 04:37

Illoqarfinni Ilulissaniit Nanortalik ilanngullugu puisit amiinik tunisineq unitsinneqarmalli, KNAPK aamma Great Greenland Naalakkersuisunit peqquneqarput aaqqiissutissanik isumaqatigiinniaqqullugit. Aalisarnermut, Piniarnermut Nunalerinermullu Naalakkersuisoq, Ane Hansen akuliukkusunngilaq.

- Isumaqatigiissinnaanngippata pingasuulluta oqaloqatigeeqqittariaqassuugut. Isumaqatigiittoqarsinnaanissaa naatsorsuutigivara, aamma eqqumaffigineqartariaqarpoq pissutsit qangatut ingerlaannarsinnaanngimmata.

- Great Greenland ukiut pingajussaat amminik tunisaqannginngajaavippoq, taamaattumilli isertitaqarani. Ammit panertitat 250.000-it tungaanut uninngasuutigivaat, Ane Hansen oqarpoq.

Inatsisartut Aalisarnermut Piniarnermullu ataatsimiititaliaat nalunaarpoq, illoqarfinni Ilulissaniit Nanortalik ilanngullugu, puisit amiisa tunisaanerisa unitsinneqarneranut atatillugu paasitinneqarsimanatik, taamaattumik Naalakkersuisumik nassuiaaffigineqarnissaminnik kissaateqarput. Aalisarnermut Piniarnermullu Naalakkersuisoq oqarpoq, paragraf 36 malillugu apeqquteqaat normu 40, ukioq manna Inatsisartunut tamanut nassuiaassutigisimallugu. Naalakkersuisup ilimagaa Aalisarnermut Piniarnermullu ataatsimiititaliap tamanna eqqumaffiginngitsuutallassimassagaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq