Aaqqiagiinnginnerit unitsinneqarput

Partiit arfineq marluussuni, taakkunani Flandern aamma Vallonien, ukioq kingulleq juunimili qinersisoqareernerani aaqqiagiinngissuteqarsimapput.

Maannali tassa, isumaqatiginninniarnerit qaammatini arfineq marlunni uninngasimasut aallarteqqipput.

Belgiap Kunngia inunnik arlalinnik isumaqatiginninniartartunik toqqartuisimavoq, politikkikkut pissutsinik iluaqutaasinnaasunik. Toqqarneqarsimasorlu kingulleq Johan Van der Nott, tassaavoq taana politikkerinik saammaatitsisimasoq, taamak DR-imiit Bruxell-imi aallartitaq Sarah Benzack Lindhardt telefuunikkut nassuiaavoq.

- Belgiami nutaarsiassaqartitsiviit hollandimiusut franskisullu oqaaseqartut, ilimagaat Belgia nutaanik Naalakkersuisoqalissasoq. Pissanganartoq tassaavoq, nutaanik naalakkersuisoqalissappat piffissaq qanoq sivisutgisoq atorneqassanersoq, naalakkersuisoqalivinnissap tungaanut. Ullumi politikkerit naapipput, ulluni 206-ini isumaqatigiisinnaassimanngereerlutik. Oqaluttuarisaanermi aatsaat taamak sivisutigisumik, politikkikkut isumaqatigiisinnaannginneq ingerlanneqarsimavoq.

Sunaana partiit avissaartuutigigaat?

- Belgiami politikkerit hollandimiusut franskisullu oqaaseqartut, nunap immikkoortuanit marlunneersut isumaqatiginngissutigaat, immikkoortuni taakkunani qanoq namminersortigissanerlutik. Belgiami hollandimiusut oqaaseqartut, piumavaat Belgiami oqartussat nunap immikkoortuanut hollandimiusut oqaaseqartunut annikinnerusumik oqartussaasoseqalissasut, taamatullu aamma nammineq akileraarutigineartartunut aalajangiisinnaassuseqalerusupput. Belgialli kujataani najugaqartut, franskisut oqaaseqartut annilaangassutigaat nammineernerulissagunik, naalagaaffimmit annikinnerusumik aningaasalersorneqalernissartik.