Aaqqiagiinnginneq taamaatinneqarpoq

Air Greenlandi, Serviceforbundet aamma timmisartortartut peqatigiiffiat Flyvebesætningsforeningen for Air Greenland, FFG, ullumi ullup qeqqata tungaanut nalunaarput, isumaqatigiissutissaq nutaaq isumaqatigiissutigisimallugu.
januaarip 14-at 2011 09:34

Illuatungeriit isumaqatigiissinnaasimaneq nuannaarutigaat, aaqqiagiinngittoqarneralu taamaatippoq. Air Greenlandip timmisartuussinerit sapaatip akunnerata naanerani ingerlateqqilissavai, ullumilu ullup ingerlanerani ulluni tulliuttuni timmisartuussinissanut paasissutissiissaaq.

Isumaqatigiinniarneq imaannaasimanngeqisoq illuatungeriit aqqusaarumasimanngikkaluarpaat, suleqatigiinnerulli nalinginnaasup piaarnerpaamik ingerlaqqilernissaa, aammalu Air Greenlandip kalaallinut inuiaqatigiinnut atussallugu piumaneqarnerata ingerlaannarnissaa anguniarlugu siumut isiginissaq isumaqatigiissutigaat.

Illuatungeriit aamma isumaqatigiissutaasup akuerineqarnissaa tunulequttaminnut kaammattuutigissallugu isumaqatigiipput.

Akuerinninnissap qanoq ingerlanera illuatungeriit imminnut kingusinnerpaamik 21. januar 2011 nalunaarutigissavaat.

Tamannalu naatsorsuutigisatut akuerineqassanngikkaluarpat, aaqqiagiinngittoqarnerata nassataanik januaarip 26-ni 2011 timmisartuussinerit unitsinneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq