Aappilattoq piorsaavigineqassanersoq nalunarallarpoq
Qaasuitsup Kommunianit aamma Namminersorlutik Oqartussanit taama nalunaartoqarpoq.
Halibut Greenland Aappilattumi 30 million koruuninik naleqartumik tunisassiorfiliorniarpoq. Kisianni aalisakkanik tunisassiorfiup aningaasaliinnginnermini pisortat ujartuiffigai inissanut, aqqusinernut talittarfeqarnernullu tunngasunut, pisortanit naliginnaasumik aningaasaliiffigineqartartunut, aaqqiissuteqarniarnersut. Aamma sulisussanut inissat meeraaqqerivillu pisariaqartinneqarput. Pilersaarutaavoq tunisassiorfissaq, ukiumut 30-nik sulisoqartussaq, 2016-ip naajartulernerani piareersimassasoq.
Kisianni pisortat apeqqutinut taakkununnga akissuteqarnissaat maanna siusippallaartoq
Qaasuitsup Kommuniata Halibut Greenland ataatsimeeqatigeqqaartariaqaara borgmester Ole Dorph ilisimatitsivoq:
- Taava tassunga atatillugu kommuunip susassaqarfii suunersut, taavalu Nukissiorfiit Namminersorlutik Oqartussallu susassaqarfii sumiinnersut ilisimalerniassagatsigu kiap suna qaqagulu suliarissaneraa, borgmester Ole Dorph oqarpoq.
Halibut Greenlandip pisortaata, Niels Thomsenip, ilanngullugu ujartorpaa pisortat Aappilattumi inissialiornissaminnut pilersaaruteqarnersut. Nunaqarfimmimi 159-nik inulimmi Halibut Greenlandip tunisassiorfiliorniarnermini nunaqarfiup avataanit sulisussanik pissarsiornissani naatsorsuutigaa. Kisianni aamma apeqqummi uani kommuunip Halibut Greenland ataatsimeeqatigalugu Aappilattumi pilersaruutaanik paasiniaavigilluaqqaarusuppaa:
- Kisianni takoqqaartariaqarparput pilersaarut qanoruna isikkulik pilersinniarneqartoq? Suliffiinikua qassit uani pilersinniarneqarnissaat naatsorsuutigineqartoq? Ole Dorph oqarpoq, ilanngullugulu oqaluttuaralugu kommuunip kultureqarnermut, atuartitaanermut sunngiffimmullu ataatsimiisitaliaa Aappilattumi meeraaqqeriviliortitsinissamut periarfissanik misissuisoq ilisimagini:
- Aamma taamatorpiaq isikkoqarpoq una aqqusineq fabrikkissap inissaata tungaanut sananeqartussaq. Tassa tamakkua tamaasa pillugit Halibut Greenlandi piffissami qanittumi ataatsimeeqatigigutsigu ersarinnerulissaaq kiap suna suliarissaneraa fabrikkip taassuma pilersinneqarnissaata tungaanut, Ole Dorph oqarpoq.
Peqqissutsimut Attaveqarnermullu Naalakkersuisoqarfimmit ilisimatitsissutigineqarpoq naalakkersuisoqarfik talittarfiit piorsaavigineqarnissaannut maanna pilersaarusiuleruttortoq. Aammalu pilersaarut taanna Naalakkersuisunut ukiamut aatsaat saqqummiunneqarumaartoq. Taamaattumik Aappilattumi talittarfiup pitsanngorsarnissaa pilersaarutaanersoq oqaatigineqarsinnaanngikkallartoq.
