Aapparisamut pinngitsaaliilluni atoqateqartartunut nutaamik malittarisassaqalernissaq IA-p piumasaraa
Maannakkummi taamaanngilaq, Naaja Nathanielsenilu taamaammat Ilaqutariinnermut Inatsisinillu Atuutsitsinermut Naalakkersuisumut Martha Lund Olsen-imut paragraf 37 arorlugu apeqquteqarpoq tusarumallugu, inatsisinik allannguinissamut qanoq isumaqarnersoq.
Martha Lund Olsen akivoq, apeqqut taanna Kalaallit Nunaani Eqqartuussiveqarnermut Siunnersuisoqatigiit isumagisussaagaat.
Taamaammat siunnersuut taanna siunnersuisoqatigiinnut saqqummiukkaanni pissusissamisoornerussasoq isumaqarpoq, pinerluttulerinermut inatsisip allanngortinnissanut siunnersuisoqatigiit siunnersuuteqarsinnaanerat siunertaralugu.
Naaja Nathanielsenilli taama akineqarnini naammageqqajanngilaa.
- Taama akinera uggornartorujussuuvoq, soorluuna naalakkersuisoq akisussaasoq sulinngiffeqartoq imaluunniit apeqqummut isumminngilluinnarsimasoq, Naaja Nathanielsen oqarpoq.
Taanna isumaqarpoq apeqqut Nunatsinni arnanut pingaaruteqartoq.
- Ajornartorsiut ilumoorussassarut isigigalugu Naalakkersuisut arnanut takutikkusukkunikku, allannguinissaq soqutigisariaqarpaat, Naaja Nathanielsen oqarpoq.
Kalaallit Nunaani Eqqartuussiveqarnermut Siunnersuisoqatigiinnut innersuussiinnaneq taassuma naammaginngilaa, politikkikkulli isummernissaq ujartorlugu.
- aapaariinnerup iluani pinngitsaaliilluni atoqateqartarneq akuerinngilluinnarlugu politikkikkut isummertoqarsinnaavoq, taamaammallu tamatumunnga tunngasumik suliaqarniarpunga, Naaja Nathanielsen oqarpoq.