Assi: European Parliament/Pietro Naj-Oleari

Qulaarpaa Aapparisamit persuttagaaneq inuunerup sinnerani kingunerlutsitsisarpoq

Aappariinni timikkut tarnikkullu anniartitaanermi, arnap imminut tatiginera milliartuinnalersarpoq. Kingunerluutit arnap ukiorpassuarni, ilaatigullu inuunerup sinnerani, atorsinnaasarpai.

Kuluk arnaavoq inuusuttoq nunaqarfimmiu. Inuusuttuaraalluni angutaatini asaqisani najugaqatigilerpaa.

Taamaammat angutaatimi persuttartalermani silarsuaa isasoorpoq.

- Persuttaanini unitsinnaveerpaa. Natermi nalavunga soriarsinnaananga. Taava toqqusassippaa taartippungalu. Isumarlunga toqusussanngorlunga, KNR-imut taama oqarpoq.

Aamma atuaruk Persuttaanerit pingajorarterutaat aappariinni pisarput

Imminut tatigiunnaavippoq

Persuttarneqartuarnini pissutigalugu Kuluk imminut tatigiunnaariartuinnarpoq. Imminut tatigiunnaarpoq suungitsutullu imminut isigilerluni.

Taamatullu misigisimalersarneq aappariinni persuttaaffiusartuni nalinginnaasuuvoq.

- Angutip iliuutsiminik paasinnittaasia arnap naleqqussarfigiartulersarpaa. Naggataatigullu nammineerluni toqqaasinnaassuseeruttarpoq, professorip Sverigemiup Eva Lundgrenip, qanoq pisoqartarnera taama nassuiaateqarfigaa.

Aamma atuaruk Persuttagaasartut ilaat illoqarfimminnit qimaasariaqartartut

Aamma atuaruk Arnat persuttarneqartut imminnut pisuutittartut

Kuluk aappariinneq persuttaaffiusoq qimassinnaanagu misigisimavoq, aamma qanoq-iliorluni qimassinnaanerlugu nalorsaatigaa. Taamaammat aqqut ilungersunartoq atorniartarsimavaa.

- Persuttagaasarnera qimarratigalugu arlaleriarlunga imminut toqoriaraluarpunga. Tamatigulli annaanneqartuarpunga, arnaq inuusuttoq oqaluttuarpoq.

Aamma atuaruk Aappariinnermi persuttaaneq eqqarsaatigilluagaasarpoq

Aamma atuaruk Aapparisamik persuttaanermi arnat eqqugaanerpaasarput

Kingunerluutit piujuartut

Kingorna annilaangarujussuartalerpoq, silamut aninissani merserisalerlugu. Tarnip pissusaanik ilisimasalimmik oqaloqateqartarpoq, tamannalu aninissaminut sapiissuseqalersippaa.

Persuttagaasarsimanermili kingunerluutai ulloq manna tikillugu suli atugarai. Inoqatiminik tatiginninnissani ajornakusoortippaa.

- Eqqarsartaatsikkut innarlerneqarpunga. Tamannalu ilaatigut pissutigalugu angutit qanillinissaat sapernartittarpara.

Kuluk ativiginngilaa. Arnap inuusuttup nunaqarfeerarmiuunini pissutigalugu kinaanini isertuukkumavaa. Aqqa aaqqissuisoqarfiup ilisimavaa.

 

 

 

Isummersuutit


 

Pages