ASSIT Aappariit Qaqortormiut inaat ukiortaami ikuallaleraluartoq
Aappariit Thomsenikkut nuannersumik ukiutoqarsiornerat nuanninngitsumik naggaserneqarpoq. Qummoroortaat ajunaalernermi kalerrisaarut igalaakkut iserluni sinittarfimmut pivoq ajoqusiingaatsiarlunilu. Qujanartumilli Susanne aamma Martin Thomsenip ernerminnut ukussaminnullu pulaarnerini tamanna pivoq.
Aappariit ernutaat Connie Fontain, KNR-imi ulluinnarni sulisuusoq taama oqaluttuarpoq.
Aappariit 66-inik 71-inillu ukioqartut politiinit nalunaaqutaq 00.45 kalerrinneqarput qummoroortaat pissutaalluni inissiaat ikuallaleraluarsimasoq. Qujanartumillu sinittarfimmi ikuallattoqarnerata inissiap sinneranut siaruaatinnginnerani qatserisartut qamissinnaasimavaat.
Susanne Thomsen, pitsorluttuusoq, oqaluttuarpoq ikuallattoqalernerani inissiamiissimannginnertik eqqissiallaatigisimallugu.
- Angerlarsimasimagaluaruma qanoq-iliorsimassagaluarnerpunga, Susanne oqaluttuarpoq.
Utaqqiisaasumik inissiamut nuuttussanngortut
Aappariit tupassimaqisut ilaqutaasalu siniffiit pigisallu allat ikuallannermi ajoqusersimasut januaarip aallaqqaataani eqqarpaat.
Susanne aamma Martin Thomsen INI A/S-imit allamut nuutsinneqassallutik ataasinngormat paasitinneqarput. INI A/S-ip aappariit, ernerminni ukussaminnilu maanna najugaqarallartut, inissiamik allamik pissarsissunnissaata tungaanut utaqqiisaasumik inissiamut piaartumik nuutsinneqassapput.
Sinittarfik ima ajoqusersimatigaaq Susanne aamma Martin Thomsen utaqqiisaasumik inissiamut nuuttariaqarlutik.