Aappariit ernerallu ujarneqarput

Nanortalimmi politiit ujaasinermik nalunaaruteqarput.

Ujaarineqartut tassaapput aappariit, 41-inik ukiulik Daniel Jacobsen aamma nulia 39-inik ukiulik Johanne Jacobsen ernerallu 14-inik ukiulik Isak Jacobsen.

Ilaqutariit taakku, sapaatiummat ualisoq nalunaaqutaq sisamat missaanni Nanortalimmiit angallammik Qaqortumukarniarlutik aallarsimapput. Angallatigaat Ørnvikki, isikkanik 15-inik takissusilik qaqortumik qalipaatilik quliguaasalillu, angallataata motoreraa Yamaha 85 hestekræftinik sukkassusilik.

Ujaasineq pillugu, Nanortalimmi politiit ittuat Niels Nyvang ima oqaaseqarpoq

-Maannakkut ujaasineq ingerlanneqarpoq. Ujakkagut tassaapput aappariit ernerallu 14-inik ukioqartoq, taakkua sapaatiummat ualikkut sisamat missaani umiatsiaminnik ørnvik-imik quleruaasalimmik Qaqortumut angerlarlutik aallarsimapput, suli apuussimanatik. Nanoratalimmiit qaqortumut ingerlaarnerat akunnernik pingasunik sivisussuseqartussaangaluarpoq, apuutinngimmatali ilaqutaasut, unnukkut qulinngulersoq politiinut nalunaaruteqarput, Nanortalimmi politiit ittuat Niels Nyvang oqarpoq.

Politiit angallataat Sisak 3 ullumilu ikiortitut imartatsinnik nakkutilliisut angallataat Triton qulimiguulimmik timmisartortaqartoq maanna Nanortallip eqqaani ujaaseqataapput. Motoorinik unittoortornermi saaviffiusinnaasut misissoqqissarneqarput. Ujaasineq ippassaq ataasinngornermi ullaakkut arfineq pingasunut aallartinneqarmat, politiit angallataat Sisak 3 piumaffineqarpoq ilaqutariit Qaqortumiit Nanortallip tungaanut aqqutigisimasinnaasaat atorlugu ingerlassasoq. Sisak 3-p ujarlerfigisinnaasat tamaasa aqqutigeriarlugit Qaqortumut unnukkut tikippoq, ujaasinerlu qaammaqqinniariartoq aallarteqqinneqarpoq.

Ilaqutariit umiatsiaminni ajunaalernermi kalerrisaaruteqarsimanngitsut Niel Nyvang Nielsen oqarpoq:

-Naagga, ilisimanngilarput ajunaalernermi kalerrisaarutinik peqarnersut, taamaallaat nalunngilarput VHF- radio-mik nassatqarsimanngitsut Niels Nyvang oqarpoq.

Politiit ujaasinerat, Imartatsinni nakkutilliisut angallataanik ataatsimik aqagu ilaneqassaaq.

Ujaarineqartut pillugit ilisimannittut takunnissimasinnaasullu, Nanortalimmi politiinut oqarasuaatikkut saaffiginnissinnaapput oqarasuaatillu nornoraa: 61 32 22 , tassa : 61 32 22

.