Aappariit ernerallu ujaarineqarput

Nanortalimmi politiit ujaasinermik nalunaaruteqarput.

Ujaarineqartut tassaapput aappariit, 41-inik ukiulik Daniel Jacobsen aamma nulia 39-inik ukiulik Johanne Jacobsen ernerallu 14-inik ukiulik Isak Jacobsen.

Ilaqutariit taakku, sapaatiummat ualisoq nalunaaqutaq sisamat missaanni Nanortalimmiit angallammik Qaqortumukarniarlutik aallarsimapput. Angallatigaat Ørnvikki, isikkanik 15-inik takissusilik qaqortumik qalipaatilik quliguaasalillu, angallataata motoreraa Yamaha 85 hestekræftinik sukkassusilik.

Ilaqutariit angallamminni VHF radioqarsimanngillat allanillu sillimanissamut atortunik nassataqarsimanersut ilisimaneqanngilaq.

Ilaqutariit pineqartut Nanortalimmiit sapaatiummalli aallaramik Qaqortumut akunnerit pingasut ingerlaneranni apuussimasussaasimagaluarput, sulili apuussimanngimmata politiit angallataannit sakkutuullu umiarsuaannit timmisartumillu qulimiguulimmik maanna ujaarineqartut Nanortalimmi politiit nalunaarput.

Ujaasineq suli ingerlanneqarpoq ilaqutariinnillu angallataannilluunniit takunnissimasinnaasut Nanortalimmi politiinut saaffiginneqquneqarput oqarasuaatillu saaffiginniffissap normoraa: 61 32 22.

Tassa 61 32 22.