KNR-TV Aappariit angalatuut tikilerput
Aappariit Dorthe Jens Kjeldsenilu asseqanngitsumik nunarsuaq kaajallallugu angalanertik naggaserlugu Paamiunut arfininngornermi ullaakkut tikissapput.
Kjeldsenikkut tikinnerat KNR TV-kkut toqqaannartumik aqagu arfininngornermi ullaakkut nalunaaqutaq 9.30 aallakaatinneqassaaq.
KNR-imeersoq Nathan Kreutzmann immiussisuussaaq.
AAMMA ATUARUK Dorthe-p uinilu Jens-Erik nunarsuaq kaajallalerpaat
Aappariit angalanertik Nuummiit juunimi 2017-imi aallartippaat. Dorthep aamma Jens Kjeldsenip tissiartaatertik atorlugu Alaskamukaarnerminni Sullualuk aqqutigaat kingornalu Manerassuarmi, Afrikami, Caribiami USA-milu sumiiffiit assigiinngitsut aqqusaarlugit.
Aappariit angalanerat uiusup ikinngussuanit, angalalluni misigisassarsiortartumit, Erik Peitersenimit, malinnaaffigineqarpoq tamannalu DR2-kkut aallakaatinneqarluni.
Angalanerminni misigisatik pissanganartut pilluarnartullu aviisimut AG-mut ilaatigut aamma oqaluttuarisarpaat.
Aappariit Dorthe Hegelund Kjeldsenip inunngorfianut, Paamiunut, maanna ingerlaaleruttorput, umiarsualivimmullu aqagu ullaakkut tikinnissaannut qitornaat, ikinngutaat ilaqutaallu tikilluaqqusinissaminnut piareersimassapput.
Tikinnerat, Nathan Kreutzmann peqatigalugu, KNR-TV-kkut toqqaannartumik arfininngornermi ullaap tungaani nalunaaqutaq 9.30-miit malinnaaffigisinnaavat.
