Aappamik persuttaaneq pinaveersaartinniarneqalerpoq

Sangianneq ningarnerlu tunngavigalugu toqutsisarneq pinaveersaartinniarneqalerpoq
Allattoq Mads Lynge
aggustip 23-at 2007 12:29

Sangianneq ningarnerluunniit tunngavigalugu inooqatigisamik toqutsisarneq pinaveersaartinniarlugu danskit politiivi suliniuteqalerput. Pilersaarusiaq ullumi saqqummersoq, aappariit iluanni persuttaasarnermik pinaveersaartitsiniutaassaaq.

Danmarkimi politeeqarfiit eqimattanik immikkut ittumik suliniartussanik pilersitsissapput, taakkulu assersuutigalugu aappariit iluanni imaluunniit aappariittut inooqatigiissimasut iluanni sioorasaarinerit, annersaanerit, pinngitsaaliinerit allaallu toqutsinerit pinaveersaartinniassavaat.

Suliniaqatigiit Naalagaaffiup politiivinut ilaassapput. Suliniarnissamillu pilersaarusiaq Naalagaaffiup eqqartuussissuserisuanit Danmarkimilu politeeqarfinnit suleqataaffigineqarpoq.

Suliniut aallartinneqassaaq inunnik isumaginnittoqarfiit, siunnersuisarfiit, qimarnguiit allallu susassaqartut suleqatigalugit.

Inuk inooqatiminit annersarneqartoq illersorlugu pinerluuteqartoq pinerluffigisamut politiit ikiorsiullugit qanillinaveersaartinneqartalissaaq. Aamma pinerluuteqartoq angerlarsimaffimmit anisinneqartalissaaq, pinerluffigineqartorlu saassunneqarnermini atugassamik kalerrisaarummik peqartinneqartalissalluni.

Pinerluffigineqartoq unnerluussassanngortitsinngikkaluarpalluunniit politiit suliamik namminneq aallartitsisinnaanngussasut, pilersaarusiami aamma allassimavoq.

Suliniut ukiortaami aallartinneqarpoq, Danmarkimi angutit aapparisaminnik, aappakuminnik inooqatigisimasaminnilluunniit toqutsisut arlalissuanngormata.

Danmarkimi toqutsinerit 2001-imiit 2006-imut ningarneq sangianneerluunniit tunngavigalugu pisartut toqutsinerit tamarmiusut 15 procenteraat.

Nunatsinni Politimestereqarfimmit Nuummittumit suliniut suli tusarneqarsimanngitsoq, politimester Bjørn Bay oqarpoq.

Nunatsinni politiit ukiumoortumik kisitsisaataat 2006-imut tunngasut naapertorlugit, pinerluuteqarnerit sakkortuut amerlanersaat ilaquttat qanigisat akornanni pisartuunerarneqarput.