Assi: Flickr

Aappaluttumi piiaavik Naalakkersuisut aalajangiiffigissavaat

LNS Greenland Aappaluttumi rubinisiorfimmut ingerlatsilersinnaanersoq sapaatip akunnerata ingerlanerani paasinarsissagunarpoq.

Aatsitassanut naalakkersuisoqarfik LNS Greenlandip rubinisiorfimmik ingerlatsilersinnaaneranut akuersaartoq, naalakkersuisoqarfimmi pisortap, Jørgen Hammeken-Holmip oqaatigaa.

- Ajorpasinngilaq, ilungersunartunillu aporfeqanngilagut, Jørgen Hammeken-Holm KNR-imut oqarpoq.

LNS Greenlandip True North Gemsip akiliisinnaajunnaarnerata kingorna Aappaluttumi rubinisiorfimmi pigisanut tigusinissaminut qinnuteqaataa naalakkersuisoqarfimmit maanna nalilersorneqarpoq.

Aamma atuaruk Qeqertarsuatsiaat eqqaani rubinisiorfik LNS Greenlandip ingerlatilertussanngorpaa

Aamma atuaruk Rubinisiorfik neriulluartitsigaluartoq

LNS Greenland piginnittuminit Norge LN-imit tapersersorneqarpoq. LNS Greenlandillu akiliisinnaajunnaarnermi pigisanut tigusinissaminut Naalakkersuisunit akuerineqariaruni sulilernissaminut piareersimasoq, LNS-imi pisortap, Frode Nielsenip KNR-imut oqaatigereerpaa.

Tamannalu naalakkersuisoqarfimmit uppernarsarneqarpoq.

- LNS Greenlandip aningaasaateqarneranut aningaasaliisussaqarneranullu takussutissaqarpugut, Jørgen Hammeken-Holm oqarpoq.

Naalakkersuisoqarfiup Naalakkersuisunut innersuussutissaa sapaatip akunnerata ingerlanerani apuunneqarumaarpoq.

LNS Greenlandip rubinisiorluarnissaanut tunisaqarluarnissaanullu qanoq periarfissagissaartigineranik naalakkersuisoqarfiup naliliinera innersuussiap ilaatigut imarissaavaa.

Aamma atuaruk  TNGG 100 millionit koruuninik amigaateqarluni akiliisinnaajunnaartoq

- Suliap ullut qulit iluanni suliarineqarnissaa oqaatigereerparput, tamannalu eqquutitissavarput, Jørgen Hammeken-Holm oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl