Sungiusaasoq: Aappagu angusarinnerusariaqarpugut

Kalaallit Nordic cuppimi peqataanerminni marlunnik pointinnapput. Tamanna naammaginanngitsoq nunanut allanut unammisartunut sungiusaasoq, René Olsen, isumaqarpoq.

Kalaallit qallunaanut unammigamik målinik marlunnik siuarsimanikuugaluarlutik ajoraluartumik angutipput unamminerlu 2-2-mik inerneqarluni. Kalaallillu Finlandimut Sverigemullu ajorsaraluartut qallunaanut naligiinnerisa kingorna Norgemut unamminermi bronzinnannissamut periarfissaqaraluarput. 

Unamminerli taanna naligiiffiuvoq. Unamminermi kukkuluttornerit akisunaarneqarput, naallu kalaallit pingasoraaraluartut pingasunik aamma isertitsiffigineqarput. Taamaammallu unammeqataasuni angusalunnerpaatut inissillutik. Tamanna naammaginanngitsoq nunanut allanut unammisartunut sungiusaasoq isumaqarpoq. 

- Nordic Cuppip inernera peqataanitsinni naammaginnanngitsutuartut isigaarput. Unamminerni tamani isertitsinissatsinnik periarfissarpassuaqartarpugut, Finlandimullu unammineq eqqaassanngikkaanni iluatsitsinerulaarsimasuugutta  unammisagut tamarmik ajugaaffiginissaannut periarfissaqartaraluarpugut, René Olsen oqarpoq.

René Olsen novembarimi nunanut allanut unammisartunut sungiusaasutut toqqarneqarpoq, taamaammallu piareersarneq sivikissimavoq. 

- Unammisartut sungiusaatigalugit unamminissaq amigaatigigaat malunnarpoq, tassami ajorsarnernik kinguneqartunik iluatsinngitsuulaartoqaalukkami. Periarfissanik atorluaasinnaaneq amigaataalaarami. 

- Unammilluartaqaagut arsariaatsillu sungiusakkatta siunertaat iluatsittaraluarput. Aamma saassusseriasaartarnerput ajunngeqaaq inuusuttagummi sukkaqigamik, Olsen oqarpoq. 

Unammisartut pingasut unamminermi kingullermi bronzinnaffiusimasinnaasumi amigaataasimapput. Tassa Markus Jensen aamma Malik Hermarij ajoqqusernerat pissutaallutik peqataanngillat, taamatullu Ari Hermann unamminerit siuliini sungaartuligaasarnermi kinguneranik maleruagassat malillugit ilaaqqusaanani. 

- Tamanna arsaaffiup iluani avataanilu malugisinnaavarput, sungiusaasoq oqarpoq. 

Cuppimi peqataaneq sungiusaasup arsartullumi immannut tatiginerulernerannik kinguneqarsimavoq. 

- Immitsinnut upperinerulerluta angerlarpugut. Aamma naqissuseqqiinnarparput ineriartussagutta sungiusaatigalugu unamminissanik pisariaqartitsinerput. Qanilliartorpagut, Finlandi eqqaassanngikkaanni, sinneri unammilluarsinnaavagut, taamaammat Nordic Cuppeqaqqilerpat pitsaanerni pingasuni akuunissarput anguniagaasariaqarpoq, Renè Olsen oqarpoq. 

Aappaagu Danmarlimi Nordic Cuppeqassaaq, tassanilu kalaallit holdinik allanik piareersaatigalugu qallunaat futsalertartuinik unammisarnissaat periarfissagissaarnerusoq KAK-mi siulittaasup John Thorsenip naatsorsuutigaa. 

AAMMA ATUARUK Nunarput Nordic Futsal Cupimi unamminermi siullermi ajorsartoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat