Aappaagumut nannuttassat saqqummiunneqarput

2012-imut nannuttassat maanna tusarliunneqarsinnaanngorput. Pisassiissutit allannguuteqaratik 140-ssapput, ukiorlu manna pisassanik qaangiisimanerit pisassiissutiniit ilanngaanneqarsinnaassallutittaaq.
decembarip 22-at 2011 15:35

Illoqqortoormiormiut nannuttassaat allannguuteqaratik 35-qqissapput. Tasiilarmiullu 25-nik nannuttassinneqaqqillutik. Tamatuma saniatigut nannunik 10-nik qaavatigut Tunumi illoqarfiit agguangassinneqarlutik pisassinneqarputtaaq.

Nunatta avannaarpiaani Inussulipaluup avannaatungaani kangerliumanermi Siorapalummiut, Moriusarmiut, Qeqertarmiut Qaanaarmiullu 6-nik nannuttassinneqaqqipput.

Qimusseriarsuarmi Davis Strædemilu Savissivimmiut 18-nik nannuttassinneqaqqipput, Upernavimmiullu ukioq manna marlunnik nannuppallaarsimammata nannuttassaat 41-nut ikilisinneqarsimallutik.

Uummannarmiut 8-nik nannuttassinneqarput, tassa ukioq manna ataatsimik pisaqarpallaarsimanerat ilanngaatereerlugu.

Nunatta kujataani piniartut ukioq manna sisamanik nannuttassineqaqqipput.

Nannuttassiissutinik nunat tamalaanut isumaqatigiissutit, uumasorsiuullu innersuussissutaat malillugit pisassiisoqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq