Aappaagumut aalisagartassiissutit akuersissutigineqarput

Uummannami Upernavimmilu sinerissap qanittuani qaleralittassat amerlasussissaat aalajangerneqarpoq, Upernavimmi 6.500 tonsinik qaleralittassiissoqarpoq, Uummannami 6.000 tonsinik pisassiisoqarluni.

Qeqertarsuup tunuani aappaagu qaleralittassat 8.000 tonsiusussatut aalajangiunneqarput, tassalu 800 tonsinik ikilisinneqarlutik.

Qeqertarsuup tunuani qalerallit ikileriarsimanerat pissutigalugu pisassiissutigineqartut ikilisinneqartut, Namminersorlutik Oqartussat nalunaarput.

Qeqertaaluup avataani Davis Strædemilu qaleralittassat amerlassusissaat allangortinneqaratik 6.500-nut 7.000 tonsinullu akuersissutigineqarput.

Tunumi qaleralittassiissutigineqartut 1.000 tonsinik qaffanneqarput. Ukiormanna 12.000 tonsit aalisagartassiissutigineqarput, aappagulu 13.000 tonsit qaleralittassiissutigineqarlutik.

Tunumi qaleralittassiissutit annerpaamik 5.000 tonsinik amerlineqarsinnaanerat biologinit Kalaallit Nunaannut Savalimmiunut Islandimullu siunnersuutigineqaraluartoq, taamallaat 1.000 tonsinik qaleralittassiisoqarpoq.

Sinerissap qanittuani saarullittassat 10.000 tonsiunissaat aalajangiunneqarpoq, naak biologit oqaraluartut aappaagu saarullinnik aalisartoqassanngitsoq.

Avataani misiliilluni saarullinniarnermi aappaagumut pisassiissutit allannguuteqaratik 5.000 tonsiunissaat aalajangiunneqarpoq.

Tunumi kitaanilu aappaagumut aalisagartassaassiissutigineqartut Namminersorlutik Oqartussat nittartagaanni atuarneqarsinnaapput.