Aappaagumit qaammammoortumik pisassiisoqartalissaaq

Umiatsiaararsorluni aalisartunut paggatassiisarneq atorunnaarseriarlugu qaammatit pingasukkaartunik pisassiisoqartaleraluarpoq.

Naalakkersuisunngortulli kingulliit paggatassiilluni pisassiisarneq atuutilerseqqippaat, taamaalilluni aalisartut aalisarluarnerusut annerpaamik pissarsisinnaanngortillugit. Tamatuma kinguneraa Qeqertarsuup Tunuani Uummannamilu pisassiissutigineqartut pilertortumik nungunnerat.

Ukiumiilli nutaamit qaammammoortumik pisassiisarneq, aalisartut tunisassiortullu ukioq kaajallallugu tunisassiorsinnaanerannik kinguneqartussaq, atuutilersinniarneqalerpoq.

- Uani oqaatigissavara aalisakkerisut, tassa fabrikkinik ingerlatsisut, Royal Greenlandip Halibut Greenlandillu kissaatigimmassuk qaammatikkaartumik pisassiisoqartalernissaa. Taamaalilluni taakkua aalisakkeriviit ukioq kaajallallugu uneqattaanngitsumik nioqqutissiorsinnaalissagamik, Aalisarnermut Naalakkersuisoq, Karl Lyberth taama oqarpoq.

Taassuma nassuerutigaa paggatassiilluni qaleralittassiisarneq pisassat taama ikitsigigallartillugit tulluartuunngitsoq:

- Pisassat naammappata soorunami taanna ingerlanneqarsinnaavoq. Kisianni paasivarput pisassat naammanngitsut. Taamaattumik pisassat ilalaannguariarlugit naatsorsuutigaara taamatut pisoqassasoq. Taava nutaamik aaqqissuussissaagut ukioq kaajallanerullugu aalisartut eqqissillutik aalisarsinnaaneruniassammata. Aamma fabrikkit ataavarnerusumik ingerlalersinnaaniassammata, Karl Lyberth oqarpoq nangillunilu:

- Tassa ukiap ingerlanerani kissaatigivara aalajangiisoqassasoq. Tassa ukioq nutaaq aallartitsitsinnagu sapinngisamik siusinaakannersumik, tassa ajornanngippat oktobarimi aalajangiisoqarsinnaanissaa kissaatigisupilussuuara. Nutaamik pisoqartariaqarami, aamma aaqqissuussinerusumik aamma pitsaanerusumik ingerlatsisoqarnissaa taanna kissaatigisupilussuugakku.