Aappaagu uuliasiornissaq qilleriffiussanngilaq
- Tamanna ajusaarnarpoq, kisianni oqarnianngilanga pakatsinartoq aammami isumaqatigiissutaavoq novembari naappat qillerinertik unitsissagaat, aatsitassaqarnermut Naalakkersuisoq Ove Karl Berthelsen oqarpoq.
Kisiannili taamaakkaluartoq ukiut arlaanni uuliamik gassimilluunniit nassaartoqarnissaa Ove Karl Berthelsenip suli neriuutigaa.
Cairn Energy ullaaq nalunaarpoq, misiliillutik qillerivitsit Atammiup avataaniittoq, A77-imik taasartik, uuliamik nassaarfiginagu qimallugu. Cairn Energykkormiut novembarip aallartilaarnerani isumallualeraluarput, qilleriffimminni sioqqat naammattuukkatik uuliaqarneranik isumallualersitsimmata. Kisianni tassa taamaattoqanngitsoq maanna paasinarsivoq.
546.5 millionit koruunit. Tassaapput aningaasat Kalaallit Nunaatsinni siorna uuliasiornermi misiliilluni qillerinerni isertitaasimasut. Cairn Energyp uuliamik nassaannginnerata kinguneranik aappaagu qillerinerit pissanngillat, taarsiullugulu misiliilluni immami sajuppillatitsilluni misissuisoqassalluni.
- Aappaagu qillerisoqassanngippat soorunami Nunatta aningaasanik annaasaqarnissaa isertuunneqarsinnaanngilaq, Ove Karl Berthelsen oqarpoq nangillunilu:
- Misiliilluni qillerisoqassanngippat aammalu aningaasanik maannatut taama amerlatigisunik kaaviijaartitsisoqassanngippat soorunami aamma sulisut ikilinissaat ilimagineqarsinnaavoq, Ove Karl Berthelsen oqarpoq.
Aatsitassaqarnermut Naalakkersuisoq ajuusaaraluarluni suli neriunnerarpoq:
- Uuliamik gassimillu immap naqqani peqartoqarneranik uppernarsaasoqarnera aallaavigalugu suli neriuutigaara, tassami qillerinissanut akuersissutit 20-t tunniutereernikuuagut, taamaattumik Nunatta ilaani arlaanni uuliamik gassimilluunniit nassaartoqarnissaa suli ilimagisinnaalluarparput, Ove Karl Berthelsen oqarpoq.
