Aappaagu Roskilde Festivalertoqarnissaanut isissutissat tamakkerlutik pisiarineqartut

Danmarkimi aappaagu Roskilde Festivalertoqarnissaanut ulluni pingasuni isissutissat tamarmik tunereerput.

Roskilde Festival marlunngornermi taama paasissutissiivoq.

Danmarkimi inuit katersuussinnaasut oqartussanit killeqartinneqarnera pissutaalluni, ukioq manna Roskilde Festivalernissaraluaq taamaatiinnarneqartoq apriilip arfineq-aappaanni nalunaarutigineqarpoq.

Ukioq manna festivaleriarnissamut billetisisimasut aappaagumut kinguartitsinissaminnut immaqaluunniit aningaasat utertissinnaanissaannut periarfissinneqarput.

AAMMA ATUARUK Ukioq manna Roskilde Festivalertitsinissaq taamaatinneqartoq

Billetisisimasut 15 procentiisa aningaasat utertinnissaat toqqarsimavaat, taakkulu 12.000-iupput.

Aappaagumut isissutissat marlunngornermi tuniniarneqalerput. Ualiinnartoq isissutissat tamakkerlutik pisiarineqareerput.

Aappaagu juunip ulluisa 26-annit juulip pingajuata tungaanut 50-issaa Roskilde Festivalertoqassaaq.

Isissutissat tamaasa nalunaaquttap akunnialuinnaat ingerlaneranni tunineqarsinnaanerat Roskilde Festivalimi oqaaseqartartumik Christina Bildemit tupaallaatigineqarpoq.

- Pisisartunut uagutsinnullu iluaqutitaqarpoq. Tunniussilluarnissatsinnik pisisartugut naatsorsuuteqarput. Tamannalu uagutsinnut aamma uppernarseqqipparput.

Isissutissat ullormut ataatsimut isissutigineqarsinnaasut ukiaru tuniniarneqarumaartut ilisimatitsissutigineqarpoq.