Assi: Camilla Dam/KNR

Aappaagu puisit aningaasanik isaatitsissutaanerussapput

Piniartut puisinniartartut amernik amerlanerusunik tunisisartut, ukioq tullermiit annerusumik isertitaqalernissaq naatsorsuutigilersinnaavaat.

Great Greenland KNAPK-lu isumaqatigiissusiorsimapput, piniartut amerlasuunik ameerniartartut, annerusumik isertitaqalersinnaasillugit. Taannalu nassuiaatissaqarpoq.

- Great Greenland-imimi maanna amernik amigaateqarpugut, Great Greenlandimi pisortaaneq Ditte Sorknæs oqarpoq.

Naak umiarsuarnik amminik pisiortuisussanik ingerlaartitsinikuugaluartut, ajornannginnerusumillu piniartut amminik tunisisinnaanissaannut periarfissiigaluartut, ammit 25.000-iinnaat pisiarineqarsimapput, naak pisiassatut killiliussaq 52.000-iugaluartoq. Taamaammat Great Greenland ammit akissaannut tunngatillugu isumassarsisimavoq, akit tummeqqatigut majuartutullusooq alliartortillugit, Ditte Sorknæs oqaluttuarpoq.
 
- Tassaavorlu piniartut puisinniarnermik inuussutissarsiutitut isumalluutillit, pitsaanerusumik atugaqarnissaat anguniarneqassasoq, Sorknæs oqarpoq.

AAMMA ATUARUK Great Greenlandip puisit amii amerlanerusut pissarsiariniarai

Taassumalu saniatigut anguniarneqarpoq inuit amerlanernik ameerniartarnissaanut kaammattorneqassasut, piniagassat allat aalisarnermullu periarfissat pinnagit, puisinniarnerup aallunnissaa toqqarniassammassuk.
 
Aaqqissuussaaneq imaappoq amermut ataatsimut akeq suli 350 kr-iussasoq, ammit amerlassutsit aaliangersimasut angunissaata tungaannut.
 
- Ammit 100-it angugaanni, taava akia 50 kr-imik qaffassaaq.

Taamaasinermilu pitsanngoriiateqassaaq, pisortaaneq oqaluttuarpoq.
 
- Ammit 200-it angugaanni taava akia aamma suli 50 kr-imik qaffaqqissaaq. Taamaasilluni ammit 200-it sinnerlugilluunniit tunigaanni, ammimut ataatsimut akia 100 kr-imik qaffassaaq.
 
Aningaasaqarnermut Inatsisini ukiup tullissaanut amerlanernik aningaasaliisoqanngilaq, taamaattorli pisassat 40.000-inut annikillissimapput.
Ammimut atatsimut akia qaffakkusukkutsigu, taava pisiassat ikilisariaqassavagut.

Great Greenland-ip pisortaanerata oqaatigivaa, pisiassat annikillinerat ulluinnarni pissutsinut sunniuteqarnavianngitsoq, pisiortornerit ilimagisamiit annerujussuunngippata.
 
- Neriuppunga 35.000-it angujumaarigut, soorlu ukioq manna taamatut naatsorsuuteqarsimagaluartugut, pitsaanerpaassavorli pisisassatut killiliussat 40.800-it angusinnaagutsigit, taamaattorli 35.000-it angugutsigit nuannaarlungalu iluarussussaanga, Ditte Sorknæs oqarpoq.
 
Great Greenlandip naatsorsuutiginngilaa ukioq tulleq umiarsumik tunitsiviusinnaasumik atueqqisalluni, naatsorsuussaagaluit anguneqanngimmata.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!