Aappaagu amigartoorutissat: 750 millioni koruunit
Nukissiorfinni sanaartornermut aningaasaliissutissatut pisariaqartinneqartut 315 millioni koruunit Naalakkersuisut aningaasanut inatsisissatut siunnersuummi ilanngussimanngilaat, Nukissiorfiit aktieselskabinngortinneqarnissaat imaaliallaannarlugu akuersissutigineqassasoq naatsorsuutigineqarmat.
- Erseqqissaatigissavarput, Nukissiorfiit aktieselskabinngortinneqarnissaat Inuit Ataqatigiinniit piffissaasorinnginnatsigu. Aktieselskabinngortitsinissamilli siunnersuut tunuartikkamikku Naalakkersuisut aamma eqqarsaatigisimassavaat, tamanna aningaasanut inatsisissamut qanoq kinguneqassanersoq. Soorunami 300 millionit qanoq pissarsiarineqassanersut eqqarsaatigisimassagaat naatsorsuutigisariaqarpoq, Inuit Ataqatigiit siulittaasuat Kuupik Kleist oqarpoq.
Aningaasanut inatsisissatut siunnersuummi 441 millioni koruunit amigartoorutaassasut naatsorsuutaareerpoq. Nukissiorfiit sanaartornermut aningaasartuutissaatut naatsorsuutigisat 315 millioni koruunit ilannguppata 756 millioni koruuninik Nunatta Karsia amigartuussaaq.
- Isumaqarpunga tamanna attanneqarsinnaanngitsoq, neriuutigaaralu, Naalakkersuisut allamik siunnersuuteqassasut. Qanoq iliortoqarsinnaanersoq, uagut soorunami eqqarsaasersuutigereernikuuarput. Kisianni isumaqarpunga aningaasanut inatsisissatut siunnersuut taamaattoq atasinnaanngitsoq, taamaatsillugu saqqummiunneqassaguni isassussasoq isumaqarpunga, Inatsisartunut ilaasortaq Kuupik Kleist oqarpoq.
