Aapakaat nerisaminnik peqqinnerulerput

Tamanna ilaannut immaqa nutaarsiassarujussuartut isigineqarsinnaanngikkaluarpoq ilisimatusartulli Amerikamiuusut aapakaanik misileraanermikkut taama oqartarneq uppernarsaatissaqartilerpaat inerneranilu takuneqarsinnaalluarpoq.

Aapakaat ukioqatigiit oqaluttuarissavagut. Aappaa utoqqarpasippoq, pualalluni pikataarpalullunilu aappaalu peqqippasippoq, imminullu isumagilluarpasilluni.

Aapakaaq oqaluttuarineqartoq kingulleq assigerusukkaanni taava maanna tusarnaarluartariaqarpoq.

Amerikamiut ilisimatusartut aapakaat 76-it ukiuni 20-ni malittarisimavaat. Taakku affaat nalinginnarmik nerisartagaannik nerisinneqartarput affaalu 30 %-imik kaloriaasannerusunik nerisinneqartarlutik. Sivisuumik inoorusuttunut aamma isikkorikkusuttunut misissuinerup inernera soqutiginaateqarluarsinnaavoq, Aapakaammi kaloriaasannerusunik nerisinneqartartut utoqqarpalunnginnerupput, sivisunerusumik uumallutik ukioqqortussutsimullu attuumassuteqartunik napparsimanikinnerullutik, soorlu sukkortortaqarpiarnatik uummalluttortaqarpiarnatik kræftertortaqarpiarnatillu, Videnskab.dk taama allappoq.

Misileraaneq aallartinneqarmat aapakaat arfineq-marluk 14-illu akornani ukioqarput, misissuinerlu ukioq manna naammassineqarmat misileraanerup inernera takuneqarsinnaavorluunniit.

Aapakaat nalinginnarmik nerisartagaannik nerisinneqartartut 37%-ii utoqqalilluni nappaatinik toqquteqarsimapput aapakaalli kaloriaasattunik nerisittakkat 13%-iinnaat taamatut toqquteqarsimallutik.

Taassuma saniatigut kræfteqartut uummalluttullu kaloriaasattunik nerisallit akornanni 50%-imik ikinnerupput naallu sukkorneq aapakaani inunnittulli nalinginnaatigigaluartoq sukkortumik ataatsimilluunniit kaloriaasattunik nerisallit akornanni naammattuuisoqanngilaq.

Ilisimatusartut aatsaat taama sivisutigisumik aapakaanik taamatut misileraasoqarpoq taamaammallu misissuinerup inerneri arlalissuit inuit atugaannut nuutinneqarsinnaasut ilisimatusartut qularinngilaat.