Aanngajaarniutit nunatsinni akiorniarneqarluarput
Aanngajaarniutit pillugit 22-issaannik Nunat Avannarliit Kangerlussuarmi sapaatip akunnerata naanerani ataatsimeersuarput.
Kalaallit Nunaat arfininngormat ingerlatsisuuvoq, aanngajaarniutit – tassa imigassap, ikiaroornartup naamaartarnerullu akiorniarneqarnerisa suli sukumiinerulernissaat tassani oqaluuserineqarput.
Aanngajaarniutit akiorniarlugit Kalaallit Nunaata suliniuteqarnera Nunat Avannarliit assorsuaq soqutiginartippaat, tamannalu Bodil Karlshøjip, Paarisameersup, nuannersumik tupaallaatigaa.
Savalimmiuniit ilaatigut apeqqutigineqarpoq, aanngajaarniutit akiorniarlugit Kalaallit Nunaanni atuarfinni periaatsit ilinniutillu imminnut atugassanngorlugit assilisinnaaneritik, tassa kopeerlugit.
Tamakku Savalimmiuni atuarfinni atugassanngorlugit assilineqarput.
Aanngajaarniutit kingunipiloqartarneri pillugit Nunat Avannarliit Kangerlussuarmi peqataatitaqartuisa sinneri ippassaq ullumikkullu saqqummiipput, suliniutit atortullu saqqummiunneqarlutik.
Aanngajaarniutit pillugit ataatsimeersuarnermi kalaallit pinaveersaartitsinermik sulialinnut attuumassuteqartut tamarmik Kangerlussuarmiipput. Peqqinnissamut Naalakkersuisoq, Asii Chemnitz Narup, ataatsimeersuarneq naggaserlugu ullumi oqalugiassaaq.
