Aamma ullumi: Air Greenlandip timmisartui putsumit uninngatitaapput
Nunatsinni putseqaaq, kingunerisaanillu Air Greenlandip timmisartuusinissaralui unitsiinnarneqarallarput.
Timmisartuussinissat unitsiinnarneqarneranni inuit 350 missaanniittut ippassaq eqqugaapput, ullumilu ullaap tungaa inuit 500 missaanniittut aamma eqqugaallutik, Niels Chemnitz Frederiksen, Air Greenlandimi ataqatigiissaarisoq naliliivoq.
- Putsernera ingerlaqqippoq, taamaattumik ippassaq kinguaattoorutitta angumeriniarnissaat ajornakusoortipparput, oqarpoq.
LÆS OGSÅ Air Greenlandip angalanissaut taamaatitsineranik ilaasut 350-it eqqugaasut
Nuissat atsinnerat ussissumillu putsernera pissutigalugu Ilulissanit Qaarsunut marlunngornermi ullaakkut timmisartortoqarsinnaasimanngilaq. Aamma Aasiannut timmisartornissat taamaatiinnarneqarput, soorlu aamma Kangerlussuarmut Sisimiunullu timmisartornissat aamma taamaatinneqartut, Niels Chemnitz Frederiksen oqaluttuarpoq.
- Kangerlussuarmi timmisartut marluk Nuummut allarnissaminnut utaqqipput, pujorli uninngaannarmat aallarsinnanngikkallarput, oqarpoq.
Sapaatip akunneri marluk putsuaarik
Pujoq uninngatillug timmisartornissaq ajornakusoorpoq.
- Sila pitsaanerusariaqarpoq. Tingeriaannaagaluarpugut, putsulli uninggatippaatigut, Niels Chemnitz Frederiksen oqarpoq.
- Ullut kingulliit 14-t nalinginnaasuusimanngillat. Ullup ilarsuani putsertarnera nalinginnasuunngilaq. Nalunaaquttap akunnialunnguaannaat ingerlanerini pujoq nungusaraluarpoq, ataqatigiissaarisoq oqarpoq
- Aamma illoqarfinni taama amerlatigisuni attatsikkutputsernera nalinginnaasuunngilaq. Ulluni makkunani qanoq ilineratigut timmisartuussisinnaanerput siumut nalileruminaappoq, pujoq aatsaat ullup ingerlanerani peeruttarmat unnulaannguarlu uteqqittarluni. Taamaattumik kinguaattornitsinnut angummanniarneq ajornakusoorpoq.
AAMMA ATUARUK Timmisartuussinissat putsumit taamaatiinnarneqartut kinguartoorlutilluunniit
Sapaatip akunnerini kingullerni marlunni putserujussarnera DMI naapertorlugu kiassuup Europameersup nunatsinnut anngunneranik peqquteqarpoq. Silaannaq kissartuuvoq isugutallunilu. Imarmut nillertumut anngukkaangami nillortarpoq ussissumillu putsilersitsisarluni.
