Aallarusseriaraluarneq atuarfiup nalunaarutigaa
Aallarusseriaraluarneq ippassaq ullup qeqqata missaani pisimasoq atuarfimmi aqutsisut nalunaarutigaat.
- Nukappiaraq oqaluttuarpoq angummik aalakoortumik oqaluunneqarsimalluni assammigullu tigutissimalluni angutillu aallarunniarsimagaani, meeqqat allat takkummata aatsaat angutip iperarsimavaa. Tamatuma kingorna angut biilinik taartumik qalipaatilimmik angallassissutinik ingerlasimavoq, atuarfiup pisortaa Dorthe Bidstrup taama oqaluttuarpoq.
Politeeqarfiup pisortaata Janus Eigaardip oqaatigaa politiit ulloq taanna allamik nassuiaanneqarsimasut:
- Politiit ullormut nalunaarusiaat naapertorlugu angut aalakoortoq atuarfiup eqqaatigut saneqqussimavoq nukappiararlu naammattooramiuk aaqqiagiinngissuteqalersimallutik. Taamaalimmallu nukappiaqqap angut kanaavatigut isimmippaa, tamannalu peqqutaavoq angutip nukappiaqqamik tigusineranut, Janus Eigaard oqaluttuarpoq.
Taassuma aamma oqaatigaa nukappiaraq angajoqqaavilu oqaloqatigereerlugit suliaq unitsinneqartoq.
Pisoq alla politiit aamma misissorpaat, tassani niviarsiaraq qulingiluanik ukiulik Qorsussuarmi atuartoq, maajip arfernani pinngitsaalillugu biilimut ikitinneqarsimanerarpoq. Niviarsiaqqap politiit oqaluttuussimavai angutip inaaniit igalaakkut qimaasimalluni.
