Aallartitarpassuit Savalimmiunukalerput
Danmarkimi nunat assigiinngitsut aallartitaasa amerlanerpaartaat, Danmark ulluni pingasuni qimakkallassavaat.
Ambassadørit 40-t 50-illu missaannik amerlassusillit ulluni pingasuni Savalimmiunut paasisassarsiorlutik angalaassapput. Angalaqatigiit katillutik 80-iussapput.
Ukiut arlalialuit allartorarlugit ambassadørit savalimmiunut angalatinneqartarput, nunallu aallartitaasa angalartinneqartarnerat, danskit naalagaaffianit akileeqataaffigineqartarmat, nunat assigiinngitsut aallartitaat Savalimmiunut angalanissamut soqutiginnittarput.
Angalatitsinermut siunertaasarpoq, nunat tamalaat Savalimmiuni pissutsinut, soorlu, aningaasaqarnikkut suliffissaqartitsiniarnikkut politikkikkut oqaluttuarisaanikkullu nunat aallartitaasa ilisimasaqarnerulernissaat.
Nunat aallartitaasa naapitassaanut ilaapput, Savalimmiuni Naalakkersuisut allallu politikkikkut nuimasut. Saqqummiisoqartarneranilu eqqartorneqartassapput, Savalimmiuni aningaasaqarneq silaannaallu allanngoriartorsimanerata sunniutai.
