Aallartitarpassuit Nuummut tikilersut

Nunat assigiinngitsut 20-it aallartitaat Nuummut ulloqeqqalerpat tikissapput. Aallartitat nunatsinnukarnerat Danmarkimi nunanut allanut ministereqarfimmit aaqqissuunneqarpoq.

Namminersornerullutik Oqartussat nunanut allanut allaffeqarfiani pisortaq Inuuteq Holm Olsen oqarpoq, aallartitanik nunani tamalaaneersunik nunatsinnukartitsineq siulliunngitsoq.

Danmarkimi nunanut allanut ministereqarfik nunatsinnut ukiut pingasukkaarlugit taama angalatitsisarpoq. Angalatsitsineq aallartitat nuliaasalu peqataaffigisarpaat, angalasullu angalanermut namminneq akiliisarput, angalatitsinerillu aallartitat nunatsinnut soqutiginnittut peqataaffigisarpaat, Inuuteq Holm Olsen oqarpoq.

Nunanit tamalaanit aallartitat 20-it ilaatigut Kinap Italiap Østrigep, Koreap Canadap Amerika Kujallermiillu Venezuelap aallartitarai.

Aallartitarpassuit Nuummut ullumi tikittussat sapaatiuppat Sarpik Ittummut ilaallutik avannamut Ilulissanut aallassapput, aqqutaani Maniitsoq, Kangaamiut, Sisimiut, Aasiaat, Qeqertarsuarlu aqqusaassallugit.