Aallartitaqarfimmik saassussineq Syriap tapersersorpaa
Syriami ministeriuneq Mohammed Naji Otri allagaatit najoqqutarlugit ima peqqusisimasutut issuarneqarpoq: "Muslimit inatsisilerituuat sheik Hassoun sakkortuunik oqaasertalimmik peqqussusiortariaqarpoq, Damaskusimi naalaffinni tallimanngornikkut qinoqatigiinnerni atorneqartussamik, matumani qanoq oqaasertaqarnissaanik killilersuisoqassanngilaq".
Telegramimi Syriami illoqarfiit pingaarnersaanni Damaskusimi Amerikamiut aallartitaqarfiannit nassiunneqartumi taama allassimavoq.
Allagaat isertuussaq nittartakkamit Wikileaksimit pissarsiarineqarsimasoq, Norgimi aviisip Aftenpostenip maanna saqqummiuppaa.
Ilanngullugu oqaatigineqarpoq Syriami naalakkersuisut "aqqusinerni eqqissiviilliornerit piffissami sivisunerusumi ingerlanneqarsinnaanerat akuerisimagaat".
Muslimit Pruffiitiata Muuamaap ilaarutigalugu titartarneqarnera Aviisip Jyllands-Postenip 2006-imi ukiukkut saqqummiummagilli, Damaskusimi eqqissiviilliornerit, Kangiani Qiterlermi nunarpassuit allat assigalugit aallartipput.
Februaarip sisamaanni 2006-imi akerliussutsimik takutitsisut Danmarkip Damaskusimi aallartitaqarfia saassuppaat ikuallatsilerlugulu.
Tamakkulu tamarmik pipput - allagaatit naapertorlugit - Syriami ministeriunerup annerusumik minnerusumilluunniit akuersineratigut.
Syriap eqqissiviilliornernut akuersaarnera qularnanngitsumik pissuteqarpoq, taamaaliornikkut nunat muslimeqarfiusut iliuuseqarsinnaanerannik, Nunat Killiit ernumalersinneqarnissaat.
Syria aserukkanut Danmarkimut 2007-imi millionit koruunit affaanik taarsiissuteqarpoq.
