Aallartitaqarfik qaqugu ammaqqissanersoq suli naluaat
Pakistanip illoqarfiisa pingaarnersaanni Islamabadimi aallartitaqarfik qaartartumik eqqorneqarmat sapaatip akunnera qaangiuppoq, qaquguli ammaqqissanersoq sulisullu tamarmik qaqugu sulileqqissanersut suli aalajangerneqanngilaq.
juunip 09-at 2008 07:07
Aallartitaqarfik qaartartumeerneqarmalli sulisut ikiuiniaqatigiillu Københavnimeersut iluarsaassillutillu nappaqqinniarlugu suliaqarsimapput. Qarmaq aallartitaqarfiup silataaniittoq suliarineqarluni maanna naammassingajalerpoq, isumannaallisaanissarlu anguniarlugu ilisimatuut maanna sullipput.
Aallartitaq Anders Hougaard oqarpoq, aallartitaqarfik initoqqaminiissanersoq suli aalajangiunneqanngitsoq, aamma nutaamik sanasoqassanersoq suli aalajangiunneqannginnerarpaa.
Qaartartumeerisuusinnaasunik suli tigusarinnittoqanngilaq. Islamabadimi politiit danskit aallartitaannut oqarput misissuisut arlalinnik pasisaqarunartut.
