Aallartitaq: Tartupaluk pillugu ikinngutigiilluarluta isumaqatiginniutigaarput
Qeqertaq Canadami Ellesmere Islandip Kalaallit Nunaannilu Qaanaap Avannaata, Nuussuup, tassa Washington Landip, akornarpiaanniippoq.
Aallartitaq taanna aviisimut Ottawa Citizenimut oqarpoq, killeqarfiliinissaq suli aaqqiissuteqartoqanngikkaluartoq, siunnersuutit arlallit piareersimapput, taakkulu isumaqatigiinniarnerni oqallisigillattaarneqarput.
- Tartupalulli pillugu nunat taaneqartut akornanni pigiliutiinnakkamik ammasumillu oqallittoqarpoq. Qeqertaarannguarmi, 1,3 kvadratkilometeriinnanik angissusilik, anorlerajoqisorlu, immini soqutiginaateqanngilaq.
- Killeqarfiliinerliuna pillugu tunngavissat, taavalu Qalasersuarmi pisuussutit oqartussaaffiginissaat soqutigineqartut, Erik Vilstrup Lorentzen oqarpoq.
Taanna isumaqarpoq, killeqarfilerngusaanneq qanittukkut aaqqiivigineqarnavianngitsoq. Eqqissisimasumilli ikinngutigiilluarlutalu isumaqatigiinniarpugut, oqarpoq.
Canadamiut qallunaallu sakkutuui imarsiortut qeqertami paarlakaajaallutik erfalasuliisarnerat aallartitap nuannersumik aamma eqqaavaa.
Qallunaat Dannebrogi qeqertami qullartarpaat, Danmark tikilluaqqullugu allagartaliisarlutik, imigassamillu Gammel Danskimik canadamiunut qimatsisarput, canadamiullumi nammineq erfalasortik soorunalimi qullartarpaat, whiskymillu Canadian Clubimik qallunaat qimatsivigisarpaat.
- Kammalaatigiitoqqatut isumaqatigiinniarpugut, Danmarkip Canadami aallartitaa oqarpoq. Tartupaluk pillugu pisup nunat tamat Haagimi eqqartuussivissuanut tunniunneqarnissaa ilimananngikkallarpoq.
