Aallartitaq nakkutigeqqissaarneqassaaq
Inummik nuimasumik Kalaallit Nunaannut aqagu tikeraartoqassaaq - Israelip aallartitaa, David Walzer, Ilulissanut tikissammat. David Walzer sapaatip-akunnerata ataatsip missaani nunatsinni angalaassaaq.
Israelimit tikeraartoqarnissaq immaqa tusaannarlugu, sioorasaarisinnaaneq sillimaniarnissarlu eqqaaqqaagassanut ilaagunarpoq. Sillimaniarnissarlumi eqqarsaatiginerullugu, aallartitap danskit marluk upalungaarsimasussat angalaqatigissavai.
Illoqarfinni David Walzerip ornitassaani politiimik nakkutilliisoqarnissaa Kalaallit Nunaanni Politeeqarfiup isumagissavaa. Walzerip illoqarfinni tikitamini biilinik angallanneqarnissaa politiip nakkutilliisussap taassuma taamaalilluni aamma isumagissavaa. Taama oqaluttuarpoq vicepolitiinspektør Karl Henrik Simonsen, allanilli piareersaateqarsimanerlutik oqaaseqarfigiumanagu.
David Walzerip Kalaallit Nunaanni angalaarnermini nulii angalaqatigissavaa, illoqarfiit ornitassaat tassaallutik Ilulissat, Sisimiut aamma Nuuk.