Aallartitap nunarput kusageqaa

Ulluni makkunani Frankrigip Danmarkimi aallartitaata, Anne Gazeau-Secret-ip nunarput siullermeerluni tikeraarpaa.

Kalaallit Nunaat nunaavoq alutornartorsuaq. Sermersuaq, kangerluit ilami pinngortitaq tamarmi Frankrigip aallartitaanut angalaqataanullu alutorsartitseqaat.

Taamaattorli Frankrigip aallartitaata pingaartinnerusai arlaqarput, siullermik silaannaap allanngoriartorneranut atatillugu unammilligassat nunatsinnuinnaanngitsoq nunarsuarmulli tamarmut pingaaruteqartut.

Aappassaanik nukissiuuteqarnermut tunngasut.

- Ukiut qulit 15-illuunniit qaangiuppata nunarsuarmi Kalaallit Nunaat pisuunerpaanut ilaalersimassaaq – ingammik nukissiuuteqarnermi isumalluutit eqqarsaatigalugit, tassaassagunartunik uulia aamma gassi.

Ullut marluk paasisassarsiorluni Nuummeereeruni sapaatip akunnerata naanerani Ilulissanukassaaq ataasinngorpallu Nuummukaqqissaaq.

Frankrigip aallartitaa angalaqatinilu Kangilinnguani sakkutooqarfiliassaaq. Sakkuttooqarfiullu Nuumminngaanniit Kangilinnguanut, tassanngaanniillu Narsarsuarmut immakkut angallanneqarnissaa isumaginiarpaa.

Anne Gazeau-Secret aammattaaq isumaqarpoq Frankrigip Nunattalu assigiissutigigaat akunnerminni kulturikkut attaveqaqatigiinnerup attatiinnarnissaa ineriartortinneqarnissaalu kissaatigigamikku. Oqaatsit aamma paarlaateqatigiinnerit suleqatigiinnermi ineriartortinneqarsinnaasutut Frankrigip aallartitaata tikkuarpai.