Aallartitagut TV-mut radio-mullu akiliineq ajorput

Folketingimut ilaasortap Lars-Emil Johansenip Danmarkimi tv-mik isiginnaarsinnaanermut aamma radiumik naalaarsinnaanermut akileraarut inatsisit naapertorlugit akiligassaasoq akilersimannginnamiuk tamanna pipallannermit kukkunerusoq oqaatigaa.

Sverigimi ministerit arlallit nunaminni tv-mut radiumullu akileraarummik akiliisarsimannginnerat paasineqareersorlu, Danmarkimi aviisit ilaat Ekstra Bladet Folketingimut ilaasortat akiliisarnersut paasiniarlugu misissuisimavoq. Taamaalilluni paasineqarpoq Atlantikup Avannaani Suleqatigiinni ilaasortat arlaannaalluunniit tv-mut radiumullu akileraarummik akiliisarsimanngitsoq.

Lars-Emil Johansen Radioaviisimut nassuiaavoq tamanna eqqumaffigisimanngikkitsik. Oqarpoq kabelikkut tv-mik isiginnaarsinnaanermut akiliisarlutik taamaalillutillu isumaqarlutik aamma taanna tv-mut radiumullu akileraarummut akiliutinut ilaasoq.

Kukkunerli tamanna aaqqinneqassaaq. – Atlantikup Avannaani Suleqatigiit allaffeqarfipput qinnuigereerparput akileraarut akileqqullugu, Lars-Emil Johansen oqarpoq.

Danmarkimi tv-mik isiginnaarsinnaanermut radiumillu naalaarsinnaanermut akileraarut ukiumut 2.090 koruuniuvoq. Kisianni akileraarut politikerit kaasarfimminnit akilernavianngilaat. Tassami suleqatigiiffiup akilissagaa isumaqatigiissutigisimavaat.