Aallartinneq ajunngitsortaqarlunilu ajortortaqartoq
Aleqa Hammondip siuttuulernerminit suut sulissutigisimanerlugit oqaluttuarisussanngormagit, aasaanerani sulinngiffeqartoqaraluartoq Hans Egedep Illua inunnik tattoqippoq. Tusagassiortunik katersortitsineq kalaallisuinnaq ingerlanneqarpoq, aamma nunatsinni oqaatsit pingaarnersaasa paasissutissiinermut atorneqarnerat pitsaalluinnarpoq. Tullianili toqqaannartumik oqaluttaanermik pitsaanerusumik isumaginnittoqarnissaa pitsaassaqaaq, tusagassiortummi kalaallisut oqaasillit allaat tallimanngornermi ualikkut iluamik oqaluttaaffigineqanngimmata.
"Nuna ataatsimoorfiusoq - inuiaat ataatsimoortut" qulequtaralugu Naalakkersuisut Hammondillu susassaqarfinni assigiinngitsuni suliniutigisimasaat aammalu Hammondip Siumullu siuttuunerisa nalaani suut siunissamut pilersaarutigineqarnersut paasissutissiissutigineqarput.
Meeqqat atuarfiata siunissaa iliuuseqarfigineqassaaq, suliffissaaleqinerup appartinneqarnissaa isumagineqassaaq, aatsitassarsiornerlu siunissami aningaasarsiutigineqartussatut isumalluarnarnerpaatut isumalluarfigineqarluni.
Sanaartornermut aningaasaliinerit nutaat qilanaarisinnaavagut, pingaartumik illoqarfiit pingaarnersaata avataani. Nuup Umiarsualivia Kujataanilu mittarfissaq innuttaasut qinersinissap tulliata tungaanut malittarisinnaasaasa ilagiinnarpaat. Naalakkersuisut siulittaasuata oqaatigisaatut ingerlasoqassappat, siunissaq qaamasuussaaq, nuanniitsumillu ilanianngikkaluarlugu aamma oqaatigisariaqarpoq, siunissaq nunatta naalakkersuisuisa neriuutigisaat qanga pisimasunut eqqaanarpallaarmat.
