Aallarniisutsialammik nersornaasiisoqartalissaaq
Suliffeqarfimmik aallarniisutsialammik toqqaasalernissaq Inuussutissarsiornermut, Nunalerinermut Suliffeqarnermullu Pisortaqarfiup maanna sulissutigilerpaa.
Suliffeqarfinnik aallarniisunut nersuiniutip agguaanneqartarnerata siunertaraa aallarniiniarumassuseqarnerup soqutiginarnerulernissaa, namminersorluni suliffeqarfinnik pigineqartunik pilersitsinissamut kajumissuseqarnerulersitsinissaq kiisalu inuussutissarsiutini tamani nutaamik eqqarsarnerup siuarsarneqarnissaa.
Aallarniisutsialammut piukkussaqaraanni piumasaqaatit ilagaat, suliffeqarfimmik ukiut pingasut kingulliit ingerlaneranni pilersitsisimanissaq, sulilu ingerlassalluni. Nutarteriuarnissanut nutaamillu eqqarsarnissamut piginnaassuseqartariaqarpoq, suliffeqarfimmik pilersitsiniarnermini aporfiusinnaasunik qaanngiiniarsinnaanermut piginnaassusai aamma nalilerneqassapput. Taamatuttaaq suliamik aallarniisoq sassarumassuseqassaaq.
Siunnersuuteqarumasut siunnersuutiminnik inuussutissarsiornermut immikkoortortameeriissapput kingusinnerpaamik pingasunngornermi aggustip qulingani. Suliffeqarfinnik aallarniillammammik toqqaaneq pissaaq Inuussutissarsiornermut, Nunalerinermut Sulisoqarnermullu Naalakkersuisup kiisalu Kalaallit Nunaanni Inuutissarsiutinut Siunnersuisooqatigiit suleqatigiinnerisigut. Ajugaasunut akissarsiassanik agguaassineq pilersaarutigineqarpoq ingerlanneqassasoq inuussutissarsiutit siuarsarneqarneranut ilusiliinissaq pillugu seminareqartitsinermut Kangerlussuarmi aggustip 22-anit 26-ata tungaanut ingerlanneqartussamut atatillugu.
