Aallakaatitassiornermut pisortaq: Mariia Simonsenip isornartorsiuinera tunngavissaqanngilaq
KNR radiomi aallakaatitassiornermut pisortap, Henriette Rasmussenip, taamatut unnerluuteqartoqarnera paasiuminaatsippaa, Mariia Simonsenilu tigussaasunik siunnersuuteqaqqullugu.
- Taamatut oqartoqarnera eqqumiilluinnartutut isigaara. KNR kusananngitsuliorfigineqartutut isigaara. Ilaasortai, uangalumi aamma, kusananngitsuliorfigineqarpugut, Henriette Rasmussen oqarpoq.
Mariia Simonsenip assersuutissaqarani taamatut isornartorsiuisinnaanera Henriette Rasmussenip paasisinnaannginnerpaa.
- Mariia Simonsen oqarpoq aallakaatitassiaq tusarnaarsimanagu, taamaammat isornartorsiuinera tunngavissaqanngitsutut isigaara. Taama sakkortutigisunik pasisaaruteqassagaanni pisuutitsillunilu, taava tigussaasunik siunnersuuteqartoqartariaqarpoq. Matumani taamaattoqanngilaq.
Partii Inuit siulittaasuata KNR radiomik nalinginnaasumik isornartorsiuinera Mariia Simonsenip ilalerpaa, KNR-illu illuinnaasiortumik tusagassiisarnera takornartaanngitsoq Sermitsiamut oqaatigalugu.
KNR Radiomi aallakaatitassiornermut pisortap oqallinneq tikilluaqqukutsoorpaa, isornartorsiunerli timitaqannginnerarpaa tusagassiortullu siulittaasuata tigussaasunik siunnersuutissaqarani taama sakkortutigisumik isornartorsiuinera paasiuminaatsillugu.
- Tunngavissaqarsorinngilara. Aallakaatitassiaq pillugu taama sakkortutigisumik oqaaseqassaguni, oqaloqatigiissutigisinnaassagutsigulu, taava tunngavissaqartariaqarpoq.
Mariia Simonsen Sermitsiamut ima oqarpoq:
- Nikku Olsen annernarsinnaasumik tikkuagaqarpoq. Innuttaasunik kiffartuussiviup, ilaatigut illuinnaasiunngitsuunissamik pisussaaffeqarnerata naammassineqarnissaanik nakkutilliiveqanngilaq – tamannali aaqqissuisoqarnikkut eqqortunik piginnaasalinnik sulisoqartuuppat aamma pisariaqassanngikkaluarpoq.
Aaqqissuisoqarnikkut aqutsisut pisariaqartunik piginnaasaqannginnerinik oqartoqarnera Henriette Rasmussenip paasiuminaatsippaa, Mariia Simonsenituulli tusagassiortutut ilinniarsimasuunerat arlallillu aqutsisutut misilittagaqarnerat erseqqissaatigaa. KNR-imilli nakkutilliiviliortoqarsinnaaneranik isuma ammaffigaa.
- Kinaassusersiunngitsumik tunngavilimmik ingerlanneqassappat nakkutigineqarnissarput ajoriffissaqartinngilarput, aamma naalaartartunik toqqissisimanerulersitsissappat pitsaaqutigiinnassavaa, Henriette Rasmussen oqarpoq.
KNR-ip Mariia Simonsen oqaloqatigaa, taannalu oqaatigisimasani itisilerusunnagit erseqqissaavoq, oqaatigisamilu itisilernissaannut tigussaasunik siunnersuutissaqarani oqaatigalugu.