Aallakaatitassiaq siulleq nerisassanut tunngasoq takutinneqaqqaarpoq
Isiginnaagassiaq "A taste of Greenland"-imik taaguuteqartoq arfinilinnik nangeqattaartuliarineqassaaq, taannalu angalanilersaarluni nerisassiornermut tunngasunik aallakaatitassiarineqartussat arfiniliusussat siullersaraat.
Aallakaatitassiat nangeqattaartuni Nunarput avammut nittarsaanniarneqarpoq.
New Zealandimiu iggarissorsuaq Chris Coubrough tv-mi igasuliullugu pinngortitaq, sulliviit nerisassiassallu takutinneqartassapput.
- Kujataa takornarianut tikeraanullu tunniussassarpassuaqarpoq, pinngortitami misigisassarpassuaqarluni nerisassiassanillu pitsassuarnik peqarluni. Filmiliornissamik pilersaarusiaq taamaalilluni maani Kujataani siunertatsinnut naleqqulluinnarpoq, filmi takutinneqareersorlu Kommune Kujallermi Inuussutissarsiornermut ataatsimiititaliami siulittaasoq, Kaj Egede oqarpoq.
- Isiginnaagassiaq assersuutissaqqilluinnarpoq suliffeqarfiit, takornariartitsisartut, ilinniarfiit, suliniaqatigiiffiit kommunillu ataatsimoorlutik annertuumik suliniuteqarnermikkut qanoq angusaqartigisinnaanerannut ersersitsivoq, Kaj Egede oqarpoq.
Takornariartitsinermut pisortaq Qaqortumeersoq aamma angusamik nuannaarutiginnilluinnarpoq.
- Kujataata pitsaanerpaartai aallakaatitap takutippai. Kinaluunniit Kujataanukarnissaminut "utaqqisinnaajunnaarsitaavoq", Pitsi Høegh oqarpoq.
Aallakaatitassiaq siulleq Narsami INUILI-mi sapaatip akunnerata tulliani takutinneqassaaq.