Aallakaatissiaq siulleq pisortap allaffianiit aallakaatinneqarpoq: Qanorooq 30-iliivoq
- Pissanganaqaaq, aatsaavissuaq inuit saallugit saqqummiusuusussaagama assorujuk annilaangallunga sajullungalu pissangarsuataarpunga.
Tusagassiortoq Malînánguaq M. Mølgaard, Qanoruukkut siullerpaamik ukiut 30-it matuma siorna toqqaannartumik aallakaatitsinermi værtiusoq, taama oqarpoq.
KNR-ip Qanoruup siullerpaamik aallatitsinera sapaatiummat 30-nngortorsiorpaa. Aallakaatitsivigisaallu siulleq KNR-ip TV-mut pisortarisimasaata H.P. Møller Andersenip allaffianiilluni.
Qanoruup aallakaatitsivia ukiuni tulliuttuni nuunneqaqattaarpoq. Siullermik pisortap allafianiit taava teknikerit inaanni taavalu KNR-p illukuani inersuaq tusarnaartitsivimmut nuunneqarpoq.
- Tassa suna tamaat naammagalugu atorniarsarivarput. Aammami takusaqarnikuunnginnatta studienik allanik, nammineq takorluukkagut maliinnarlugit suliarivarput.
KNR 1958-imi tunngavilerneqarpoq. Nutaarsiassaqartitsivik toqqaannartumik KNR-TV-kut nutaarsiassanik aallakaatitsineq 1989-imi aallartippoq – taamatut Qanorooq aallartinneqarpoq.
Nalliuttorsiorneq pillugu ilanngutassiaq uani takuguk.