Aallaasinik atuisinnaanermut ukiunik minnerpaaffiliinissaq siunnersuutigineqartoq

Inuusuttuaqqat siunissami aallaasisassagunik 16-inik ukioqalereersimasariaqarput. Aamma sakkut imassallu ullumikkumit isumannaannerusumik toqqortarineqartalissapput. Nunatsinni sakkut pillugit inatsisip malunnaatilimmik sukannernerulersinnissaanut siunnersuummi allannguutissat ilaat taakkuupput.

Danskit naalakkersuisuisa – nunatsinni Naalakkersuisut suleqatigalugit – nunatsinni sakkut pillugit inatsisip malunnaatilimmik allanngortiteriffigineqarnissaanik siunnersuuteqarput.

Malunnaateqarnerpaatullu, aallaasisassagaanni, atuissagaanni pisissagaannilu minnerpaamik 16-ileereersimanissaq siunnersuutigineqarpoq.

AAMMA ATUARUK Sakkut pillugit inatsit Naalakkersuisut sukaterniaraat

Ullumikkut kikkulluunniit - aamma meeqqat - tunngaviatigut sakkunik paarisaqarlutillu atuisinnaatitaapput. Sakkulli ulorianarnerusut, soorlu aallaasit halvautomatiskit eqittaannartakkallu atussagaanni politiinit immikkut akuersissuteqarnissaq pisariaqarpoq.

Ukiuni kingulliunerusuni meeqqat ajutoortarnerisa kingunerisaanik sukaterisoqartussanngorpoq.

Ilaatigummi Tasiilami 2016-imi nukappiaraq qulingiluanik ukiulik aallaammik pinnguartoqarnerani aallartoorfigineqarluni toquvoq, 2017-imilu aamma Tasiilami aallaammik pinnguartoqarnerani niviarsiaq tallimanik ukiulik talimigut aallartoorfigineqarpoq.

16-it inorlugit ukiullit inersimasunik peqateqarlutik aallaasinik atuisinnaatitaassapput

Naalakkersuisut Danmarkimilu Inatsisinik atuutsitsinermut ministeqarfimmeersut, ilaatigut politimesterip Bjørn Tegner Bayip peqataaffigisaanik, Nuummi oktobarip qaammataani ataatsimiinneranni nutaanik malittarisassaliornissarmik siunnersuuteqarnissaq isumaqatigiissutigineqarpoq.

AAMMA ATUARUK Politi: Nukappiaraq aallartoorfigitinnermi kingorna toquvoq

Ataatsimiinnermilu illuatungeriit isumaqatigiissutigaat inatsisinik sukaterisoqassasoq, piniarnermilli aalisarnermillu nunatsinni ileqquusut ataqqineqassasut.

Taamaammat inuusuttuaqqat 16-it inorlugit ukiullit aallaammik paarisaqarlutillu atuisinnaatitaassapput 18-ileereersimasumik peqateqarunik. Inersimasorli piniarnermut imaluunniit sunngiffimmi piniarnermut akuersissummik atuuttumik peqartariaqartoq, inatsisissatut siunnersuummi atuarneqarsinnaavoq.

Nunatsinni sakkut pillugit malittarisassani 1992-imi kingullermik allanngortitsisoqarpoq.

Inatsisissatut siunnersuut 2019-imi januaarip qulingata tungaanut tusarniutigineqassaq uanilu atuarneqarsinnaalluni. Siunnersuut kingorna Inatsisartuni Folketingilu oqaluuserineqassaaq.

AAMMA ATUARUK Aallartoortoqarnera alianartumik kinguneqarpoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat