Aallaasersortoq killisiorneqarpoq

Allattoq Mads Lynge
marsip 31-at 2007 17:30

Arnaq 30-t sinnerlugit ukiulik Nuummi Nuussuarmi ippassaq aallaasersortoq, Nuummi eqqartuussivimmi najuutinngikkaluartoq inatsit tunngaviusoq naapertorlugu ullumi killisiorneqarpoq.

Arnaq napparsimammat eqqartuussivimmi najuussinnaasimanngilaq, qaammatinili pingasuni tigummigallagassanngortinneqarnissaa politiit piumasarisimavaat, tarnikkullu misissorneqartussaassalluni.

Arnap illersuisia piumasarisimavaa arnaq akunnerni 24-ni tigummigallagaassasoq, tamannalu eqqartuussivimmit malinneqarpoq.

Taamatut aalajangerneq unnerluussisunit suliareqqitassanngortinneqarpoq.

Vicepolitimester Morten Nielsen radioaviisimut taama oqarpoq.

Inissiat ilaanninngaanniit aallaasersortoqarpoq, angullu tassani najugaqartoq politiinit tigusarineqaraluariarluni aallaasersornermut akisussaasuunnginnerarneqarluni iperaqqinneqarpoq.