Aallaasersortarnerit unitsillit

Demokraatineersullu Jens B. Frederiksen-ip taamaaliortarneq sukumiisumik iliuuseqarfingerusullugu, inatsisinut ataatsimiititaliaq tuaviornerpaamik ataatsimeeqatigiinnissaat noqqaassutigaa.

Arfininngormat aamma taamatut pissutissaqarani aallaasersortoqaqqippoq, tassa nuussuarmi ineqarfiit akornanni aallaasersortoqaqqimmat. Qujanartumilli ajoqusertoqanngilaq, innuttaasulli annertuumik annikilliortitaallutik.

Kingullermillu taamatut aallaasesortoqarpoq februar-ip qaammataani, tassanilu Kangaamiormioq politiit malittarisassaanik unioqqutitsisimasutut unnerluussaalluni.

Demokraatit ukiuni arlalinngortuni, inatsi taanna allangortinniarsimavaat,  aallaasersornermut pineqaatissiissut sukateriffigineqarnissaa noqqaassutigiuarsimallugu.

Ineqarfiit akornanni taamatut aallaasersortarneq, Kalaallit Nunaata pinerluttulerinerup inatsisaanut nuunneqassasoq 2006-mili siunnersuutigivara.

Siunnersuutinnut tungavinginikuuvara, sulilu tungavingalungu, aallaasersortoq, pinerluttulerinerup inatsisaanik tungavigalugu pineqaatissinneqarsinnaangilaq, ulorianartorsiortitsisimasoq, toqutseriarsimasoq, assingisaanilluunniit pinerluuteqarsimanersoq upernarsarsinnaangikkaanni, taamaalillunilu politiit peqqussutaat malillugu, taamaallaat pineqaatsissinneqarsinnaalluni, pinerluttorlu annikittunguaannarmik akiligassinneqassaneranik kinguneqartarluni, taama  Jens B. Frederiksen nassuiaavoq.

Taamaattoqarneralu illoqarfiup iluani aallaasersornissamut avaarsaataaneq ajorpoq.

Pineqaatissiissutillu assingiinngittunik siunertaqartarput.

Pingaarnerit marluk tassaappput, pineqaatissiissutip, pinerluttoq aappassaanik assingusumik pinerluuteqaqqinnginnissaa, taavalu pineqaatsissiissutip inuit allat assingusumik pinerlunnginnissaanut eqqarsaatissiissutaasarluni.

Demokraatillu, ineqarfiit akornanni aallaasersortarnerit sakkortuumik akiornialerpaat, tassa taamatut aallaasersortarnerit pinerluttulerinerup inatsisaanut  nuullugu pineqaatissiissutinngortissallugu.

Taamaaliortoqartuuppat pineqaatissinneqarsimasut inissiisarfiannut inissinneqarsinnaanngussagaluarput politiiniillu aallaassaanik arsaarneqarsinnaalissallutik, Jens B.Frederiksen oqarpoq.