Aallaaseqarani VM-rataannaavoq
Sisoraatigaluni ooqattaasartartup Øystein Slettemarkip qoorortuuakkani nassanngikkallarlugu sisoraatinik oqilaniunnermi Østrigimi unammeqataanini pissarsiffigilluarpaa. Tassani 10 kilometerimut saarlisaarluni unamminerminni qallunaat VM-imut peqataanissamut piumasaqaataat sekundinik 55-inik ataappai.
Unammineq Austria Cup illoqarfimmi Rosenauimi ingerlanneqartoq nalerorluarsimavaat tassami ulluni makkunani sisoraaserluni ooqattaasartartut nunatsinneersut Østrig-imi sungiusaqatigiimmata.
Tassani unamminermi peqataasunit 45-unit Øystein Slettemark normu 8-taalluni apuuppoq. Kristian Kristoffersen tassani normu 25-nngorpoq. Øystein Slettemark Danmark sinnerlugu 2010-mi OL-qataasumit Jonas Thor Olsenimit sekundinik 30-nik sukkaneruvoq.
Unamminerlu naammasseriitsiartoq qallunaat nunanut allanut unammisartuini sungiusaasumit Øystein Slettemark attavigineqarpoq. Tassani ilisimatinneqarpoq VM-imut piumasaqaatit ataasiarluni ataateqqissinnaagunigit VM-imut Oslo-mi februarip naaneraniit pisussamut toqqarneqarsinnaasoq.
- Oslomi VM-qataanissaq uannut misigisaq imaannaanngitsorujussuussaaq assorsuarlu maannamut angusama pitsaanersaat tassa 55 fis-punkter angorusuppara imaluunniit qaangerlugu. Taanna anguara 2003-imi Val di Fiemme-mi VM-qarnerani 50 kilometerimut unamminermi, taama Øystein Slettemark oqarpoq.
